Polısıa qyzmetkerleri balapandary bar aqqýlar otbasyn ótkizý úshin qozǵalysty toqtatqan beınejazba áleýmettik jelide jyldam tarady. Tártip saqshylarynyń bul áreketi júzdegen qoldanýshyny tolǵandyrdy, dep habarlaıdy infohub.kz saıty.
Qostanaı oblysy polısıa departamentiniń málimetinshe, beınejazbanyń keıipkeri – Qostanaı aýdany patrúldik polısıa vzvodynyń ınspektory, polısıa aǵa leıtenanty Alı Erulan. Ol áriptesi Aıdarbek Alseıtovpen birge qyzmet atqaryp júrgende joldyń qasynan balapandary bar aqqýdy baıqaıdy. Qozǵalys qarqyndy bolǵandyqtan, qustar joldan qaýipsiz óte almaı turǵan. Polıseıler joldy ýaqytsha jaýyp, qustar otbasyna tynysh ótýge múmkindik berýdi uıǵardy.
Alı Erulannyń aıtýynsha, bul oqıǵa oǵan Torǵaı aýylynda ótken balalyq shaǵyn eske túsiripti. «Áriptesim Aıdarbek Alseıtovpen birge patrúldep júrip, kishkentaı balapandary bar aqqýlar otbasyn kórdim, kóz aldyma birden balalyq shaqtan estelikter oraldy. Esimde, birde bizdiń aýyldyń mańyna jyl qustary – aqqýlar toby toqtaǵan edi. Biz sonda bala edik: qustardy úrkitpeı, kerisinshe, olarǵa tynysh jol jalǵastyrýǵa kómektesýge tyrysatynbyz. Búginde biz esh oılanbastan qozǵalysty toqtatyp, aqqýlarǵa balapandarymen birge joldan qaýipsiz ótýge múmkindik berdik. Bireýler úshin bul birneshe mınýt kútý ǵana, al biz úshin – aman qalǵan ómir jáne bul álemdi sál de bolsa meıirimdi etý múmkindigi», — dep bólisti ol.
Alı Erulan ishki ister organdarynda jeti jyldan beri qyzmet etedi jáne polıseıdiń ózi moıyndaǵandaı, mundaı erekshe jaǵdaı onyń basynda birinshi ret boldy.
Polısıa qyzmetkerleriniń bul áreketi ınternette keń rezonans týdyrdy. Qoldanýshylar patrúldikterdiń janashyrlyǵy úshin alǵys bildirdi.
Buǵan deıin Almatyda úsh jigit sýǵa batyp bara jatqan ıtti qutqarǵan edi.