Qostanaı oblysynda ústeme jumys ýaqyty, demalys jáne mereke kúnderindegi eńbek aqyny tóleýge qatysty eńbek daýy medıatıvtik kelisimge qol qoıýmen aıaqtaldy, dep habarlaıdy infohub.kz saıty.
Qostanaı oblysy sottarynyń resmı Telegram-arnasynda habarlanǵandaı, Qarabalyq aýdandyq soty JSHS-ke qarsy úsh dúken satýshysynyń azamattyq isin qarady. Áıelder jumys berýshiden ústeme jumys ýaqyty, demalys jáne mereke kúnderindegi jumys úshin tólenbegen jalaqyny, sondaı-aq paıdalanylmaǵan eńbek demalysy úshin ótemaqy men moraldyq zıandy óndirip alýdy talap etti.
İsti qaraý barysynda talapkerler JSHS-ke tıesili dúkende satýshy bolyp, 8:00-den 23:00-ge deıin jumys istegeni anyqtaldy. Jumys berýshi olardy júıeli túrde ústeme jumysqa, sondaı-aq demalys jáne mereke kúnderindegi jumysqa tartqan, alaıda naqty jumys istegen ýaqyt úshin tólem tolyq kólemde júrgizilmegen. Sonymen qatar, jumystan bosatylǵan kezde olarǵa paıdalanylmaǵan eńbek demalysy úshin ótemaqy tólenbegen.
Tatýlastyrý rásimderi aıasynda sýdıa-medıator taraptarǵa Qazaqstan Respýblıkasynyń «Medıasıa týraly» zańynda kózdelgen daýdy beıbit jolmen retteýdiń artyqshylyqtaryn túsindirdi. Nátıjesinde taraptar ózara tıimdi ymyraǵa kelip, medıatıvtik kelisim jasasty. Kelisim sharttary boıynsha talapkerler talap qoıý somasyn árqaısysy 500 myń teńgege deıin azaıtty, al jaýapker belgilengen merzimde kórsetilgen somalardy tóleýge mindettendi.
Sot uıǵarymymen medıatıvtik kelisim bekitilip, azamattyq is boıynsha is júrgizý toqtatyldy.