Qostanaı oblysynda 15 jasar balanyń qazasy jáne onyń anasynyń jaraqat alýyna qatysty sot prosesi bastaldy. Tergeý nusqasy boıynsha, jasóspirim otbasylyq janjal kezinde áıeldi qorǵaýǵa tyrysqan, dep habarlaıdy infohub.kz saıty.
Eske salaıyq, 25 sáýirde Jitiqarada turmystyq janjal bolyp, 37 jastaǵy áıel pyshaq jaraqatyn alǵan, al onyń uly oqıǵa ornynda qaıtys bolǵan. Polısıa qyzmetkerleri izin sýytpaı jábirlenýshiniń kúıeýin ustaǵan. Belgili bolǵandaı, sot aldyna jergilikti turǵyn Evgenı Kanylın keldi, ol áıeldi óltirýge oqtalý jáne kámeletke tolmaǵandy óltirý faktileri boıynsha aıyptalýda.
İs materıaldaryna sáıkes, qaıǵyly oqıǵa otbasynyń páterinde bolǵan. Oqıǵaǵa deıin jubaılar týysymen birge аlkogól ishken. Qonaq ketkennen keıin erli-zaıyptylar arasynda janjal shyqqan.
Prokýrordyń málimdeýinshe, aıyptalýshy as úı pyshaǵyn alyp, áıeliniń ishine urǵan. Anasynyń aıqaıyn estip, bólmege 15 jasar uly júgirip kirip, er adamdy toqtatýǵa tyrysqan. «Kanylın aldynda kámeletke tolmaǵan bala turǵanyn túsine otyryp, oǵan pyshaq júzimen tórt soqqy jasady», — dedi memlekettik aıyptaýshy Gúlmıra Kenjetaeva.
Alǵan jaraqattarynan jasóspirim oqıǵa ornynda qaıtys boldy. Tergeý nusqasy boıynsha, odan keıin er adam áıeline jatyn bólmede shabýyldaýdy jalǵastyrǵan. Ony toqtatyp, qarýsyzdandyrýǵa áıeldiń týysy, apaıynyń aıqaıyna páterge qaıtyp kelgen adam qol jetkizgen.
Sot-psıhıatrıalyq saraptama aıyptalýshynyń psıhıkalyq aýrýy joq ekenin jáne qylmys kezinde óz áreketterin sanaly túrde basqara alǵanyn kórsetti. Memlekettik aıyptaýshy sottan Evgenı Kanylındi kináli dep tanyp, oǵan ortasha qaýipsizdiktegi qylmystyq-atqarý júıesi mekemesinde 22 jyl bas bostandyǵynan aıyrý jazasyn taǵaıyndaýdy surady.
Jábirlenýshi jáne qaıtys bolǵannyń týystarynyń ókili ómir boıy bas bostandyǵynan aıyrýdy talap etýde. Aıyptalýshy kinásin tolyq moıyndap, ókinetinin bildirdi: «Men týystaryma qatty qaıǵy ákeldim. Men bári osylaı bolǵanyn qalamadym. Keshirińizder meni».
Qylmystyq is boıynsha úkim jaqyn kúnderi jarıalanady dep josparlanýda.