Kóstanaıda jaıaý júrginshiler ótkelinde erli-zaıyptylardy qaǵyp ketken júrgizýshige úkim shyǵaryldy. Áıel alǵan jaraqattardan qaıtys boldy, al er adam tiri qaldy. Aıyptalýshy naqty merzimge bas bostandyǵynan aıyrylyp, bes jylǵa júrgizýshi kýáliginen aıyryldy. Bul týraly infohub.kz habarlaıdy.
Kóstanaı oblysy sottarynyń resmı Telegram-arnasynda habarlaǵandaı, qylmystyq is Kóstanaı №2 sotynda qaraldy. Júrgizýshi jol júrisi erejelerin buzyp, abaısyzda adam ólimine ákep soqtyrdy dep aıyptaldy (Qazaqstan Respýblıkasy Qylmystyq kodeksiniń 345-baby 3-bóligi).
Sot anyqtaǵandaı, 2025 jylǵy qyrkúıekte aıyptalýshy Qaıyrbekov kóshesimen kele jatyp, 1967 jáne 1963 jyly týǵan jaıaý júrginshilerdi qaǵyp ketken. Olar baǵdarshamsyz jaıaý júrginshiler ótkelinen joldy kesip ótip jatqan. Saldarynan erli-zaıyptylar ártúrli dárejedegi jaraqattar alǵan, keıin áıel qalalyq aýrýhanada qaıtys bolǵan.
Aıyptalýshy kinásin tolyq moıyndap, sottan qoǵamnan oqshaýlaýǵa baılanysty emes jaza taǵaıyndaýdy surady. Jábirlenýshiler sheshimdi sottyń qaraýyna qaldyrdy. Úkim shyǵarý kezinde sot jeńildetetin mán-jaılardy eskerdi: jábirlenýshilerge materıaldyq jáne moraldyq zalaldy tolyq óteý, shyn júrekten ókiný jáne kináni tolyq moıyndaý. Aýyrlatatyn mán-jaılar anyqtalmady.
Aıyptalýshynyń jeke basyn, jábirlenýshilerdiń pikirin jáne istiń barlyq mán-jaılaryn eskere otyryp, sot eki jylǵa bas bostandyǵynan aıyrý jazasyn taǵaıyndady. Jaza eń tómengi qaýipsizdiktegi qylmystyq-atqarý júıesi mekemesinde óteledi. Sonymen qatar, júrgizýshi bes jyl merzimge kólik júrgizý quqyǵynan aıyryldy. Úkim zańdy kúshine engen joq.