Qostanaıda sot sapasyz plasıkalyq operasıaǵa baılanysty 1,3 mln teńgeden astam aqsha óndirdi. Operasıa nátıjesinde áıeldiń joǵarǵy erninde tyrtyq deformasıasy paıda bolǵan. Bul týraly infohub.kz saıty habarlaıdy.
Qostanaı oblysy sottarynyń resmı Telegram-arnasynyń málimetinshe, Qostanaı qalalyq sotynda bir áıeldiń ekinshi áıelge qatysty aqshany qaıtarý jáne moraldyq zıandy óteý týraly talap aryzy qaraldy.
Sot anyqtaǵandaı, 2024 jylǵy qazanda jaýapker talapkerge heıloplastıka (erinniń pishinin, kólemin nemese kontýryn ózgertetin hırýrgıalyq operasıa) jasaǵan jáne ol úshin 120 myń teńge alǵan. Qanaǵattanarlyqsyz nátıjege baılanysty 2025 jylǵy sáýirde 90 myń teńge turatyn qaıtalama operasıa jasalǵan.
Ýákiletti organnyń tekserýi barysynda jaýapkerdiń «plasıkalyq hırýrgıa» mamandyǵy boıynsha sertıfıkaty jáne medısınalyq qyzmetpen aınalysýǵa lısenzıasy bolmaǵany anyqtaldy. İs boıynsha keshendi sot-medısınalyq saraptama taǵaıyndaldy. Saraptama qorytyndysy boıynsha, talapkerdiń joǵarǵy erninde operasıa kezinde tinderdi shamadan tys alyp tastaý saldarynan tyrtyq deformasıasy paıda bolǵan. Jasalǵan hırýrgıalyq aralasýlar men keltirilgen zardaptar arasynda tikeleı sebep-saldarlyq baılanys bar. Densaýlyqqa keltirilgen zıan ortasha aýyrlyqtaǵy dep baǵalandy.
Sot jaýapkerdiń qajetti beıindik bilimi men lısenzıasyz, sondaı-aq medısınalyq qujattamany resimdemeı medısınalyq qyzmet kórsetkeni, bul talapkerdiń densaýlyǵyna zıan keltirgeni týraly qorytyndyǵa keldi. Sot sheshimimen talap aryz ishinara qanaǵattandyryldy. Jaýapkerden óndirilgen somalar: 210 myń teńge — tólengen operasıalardyń quny, 700 myń teńge — moraldyq zıan úshin ótemaqy, 457 myń teńge — sot saraptamasyn júrgizýge jumsalǵan shyǵystar. Sot sheshimi zańdy kúshine engen joq.