Qostanaı oblysynyń polısıasy dıalız ortalyǵynyń qyzmetkerin balaǵattap, dene jaraqatyn salamyn dep qorqytqan naýqastyń jeke basyn anyqtady. Ol 70 jastaǵy zeınetker bolyp shyqty, dep habarlaıdy infohub.kz.
Qostanaı oblystyq polısıa departamentiniń málimetinshe, er adamǵa Qazaqstan Respýblıkasy Ákimshilik quqyq buzýshylyq týraly kodeksiniń 80-1-babynyń 2-bóligi boıynsha ákimshilik hattama toltyryldy. Zeınetkerdi medısına qyzmetkerin balaǵattap, qorlaǵany úshin aıyptady. Jaza sharasyn sot anyqtaıdy.
Buǵan deıin, 16 shildede, áleýmettik jelilerde Qostanaıdaǵy «Bıos» dıalız ortalyǵynyń fılıalyndaǵy janjaldyń beınejazbasy paıda boldy. Jazbada er adam ortalyq qyzmetkerin balaǵattap, ony «óltirip tastaımyn» jáne «basyn julyp alamyn» dep qorqytqan. Medısına qyzmetkeriniń aıtýynsha, janjal onyń dıalız prosedýrasyna basqa aýysymda kelýin ótingennen keıin bastalǵan.
Beınejazba jarıalanǵannan keıin redaksıa memlekettik organdarǵa túsinikteme surap júgindi. Polısıa departamentinde resmı ótinishter túspegenin habarlady. Qostanaı oblystyq densaýlyq saqtaý basqarmasy dıalız ortalyǵy jeke medısınalyq uıym bolyp jumys isteıtindikten, aralasa almaıtyndaryn málimdedi.