Qostanaı oblysynyń oblystyq tótenshe rezervinen tótenshe jaǵdaı rejımi engizilgen aýdandardaǵy sý tasqynynyń zardaptaryn joıýǵa 2,4 mlrd teńge bólindi, dep habarlaıdy infohub.kz saıty.
Qarajat halyqqa keltirilgen zalaldy óteýge, birjolǵy áleýmettik kómek tóleýge, sondaı-aq zardap shekken eldi mekenderdegi jol ınfraqurylymy men elektrmen jabdyqtaýdy qalpyna keltirýge jumsaldy. Eń kóp qarajat Arqalyq qalasyna — 880 mln teńge, Qostanaı aýdanyna 419 mln, Amangeldi aýdanyna 351 mln, Jangeldi aýdanyna 316 mln, al oblys ortalyǵyna 300 mln teńge bólindi.
Oblys ákimdiginiń baspasóz qyzmetiniń habarlaýynsha, Qazaqstan Respýblıkasy Úkimetiniń tótenshe rezervinen Arqalyq qalasynda páter satyp alýǵa 405 mln teńge kólemindegi alǵashqy transh bólindi. Bul qarajatqa 27 páter satyp alyndy.
Ólgen mal úshin ótemaqy 780 basqa tólendi. Jalpy sý tasqynynan 980-nan astam mal basy qyryldy.
Áleýmettik kómek 1 736 ótinish boıynsha 640,9 mln teńge somasynda tólendi. Amangeldi aýdanynda barlyq 317 ótinish óńdeldi, basqa aýdandarda jumys jalǵasýda. Ótinishterdi qabyldaý jáne tólemder toqtatylǵan joq. Qazirgi ýaqytta zardap shekken turmystyq tehnıka men jıhazdy baǵalaý boıynsha esepter daıyndalýda, odan keıin halyqqa zalaldy óteý bastalady.
Eske sala keteıik, sý tasqyny Qostanaı oblysyna 25 naýryzda kelgen edi. Aldymen Arqalyq mańyndaǵy aýyldar sý astynda qaldy, keıin Jangeldi jáne Amangeldi aýdandarynyń eldi mekenderi zardap shekti — 28 naýryzda ol jerde tótenshe jaǵdaı rejımi engizildi. Keıinirek Qarasý, Qostanaı aýdandary men Qostanaı qalasynda da tótenshe jaǵdaı jarıalandy.
Buǵan deıin Ekidin aýylynda sý tasqynynan baspanasynan aıyrylǵan 24 otbasy Arqalyqta alǵashqy páterlerin alǵan bolatyn.