Resmı Máskeý eýropalyq saıasatkerlerdiń Reseı Eýropa elderine qaýip tóndiredi degen tujyrymdarymen múldem kelispeıdi. Bul týraly Reseı Federasıasy prezıdentiniń baspasóz hatshysy Dmıtrı Peskov Fransıanyń «Ulttyq birlestik» partıasynyń ókilderi Marın Le Pen men Jordan Bardellanyń jaqynda aıtqan sózderine qatysty pikir bildirgende málimdedi, dep habarlaıdy infohub.kz saıty.
Peskovtyń aıtýynsha, mundaı málimdemeler qabyldanbaıdy. «Reseı ne Fransıaǵa, ne Eýropadaǵy birde-bir memleketke qaýip tóndirmeıdi. Bul týraly prezıdent (RF Vladımır Pýtın — red. esk.) birneshe ret aıtqan», — dep atap ótti ol.
Kreml ókili osylaısha Fransıanyń «Ulttyq birlestik» partıasynyń kóshbasshylary Marın Le Pen men Jordan Bardellanyń Reseı qaýip tóndirý arqyly Fransıanyń saıasatyna yqpal etýge tyrysyp jatqany týraly málimdemesine jaýap berdi.
«Sondyqtan mundaı málimdemelermen biz múldem kelispeımiz, olardy qabyldamaımyz», — dedi Peskov.
Ol sondaı-aq Máskeýdiń eýropalyq memlekettermen arasynda eleýli qaqtyǵysqa sebep bolatyn eshqandaı daýy joq ekenin atap ótti. Onyń aıtýynsha, reseılik tarap eshkimge qaýip tóndirmeıdi jáne eshkimdi shantaj jasamaıdy.
Buǵan deıin Reseı prezıdentiniń baspasóz hatshysy Dmıtrı Peskov Vladımır Pýtınniń Ýkraına prezıdenti Vladımır Zelenskımen Maıamıde kezdesýi múmkin emestigin málimdegeni habarlanǵan bolatyn.