Kreml Reseıdiń Irkýtsk oblysynda oba indetiniń órshýi múmkin degen habarlamalarǵa qatysty pikir bildirdi. Reseı prezıdentiniń baspasóz hatshysy Dmıtrı Peskov 5 qazandaǵy brıfıńte tek Rospotrebnadzordyń derekterine súıenýge jáne aımaqtaǵy ahýalǵa qatysty taraǵan qaýesetterge senbeýge shaqyrdy, dep habarlaıdy infohub.kz saıty.
«Osy salada quzyretti bas vedomstvo — Rospotrebnadzor. Ártúrli qaýesetter men áńgimelerge qulaq aspaı, dál sol Rospotrebnadzordyń resmı málimdemelerine súıený kerek», — dedi Peskov.
Oba týraly qaýeset Irkýtsk ǵylymı-zertteý obaǵa qarsy ınstıtýtynyń 28 jastaǵy qyzmetkeri Dará Shıpılova qaıtys bolǵannan keıin paıda boldy. Áleýmettik jeliler men buqaralyq aqparat quraldarynda ol zerthanada oba qozdyrǵyshy salynǵan probırkany syndyryp alǵan bolýy múmkin degen nusqa tarady.
Rospotrebnadzor bul nusqany rastaǵan joq. Resmı derekter boıynsha, qyzmetkerge etıologıasy anyqtalmaǵan pnevmonıa dıagnozy qoıylǵan. Zertteýler onyń kásibı qyzmetine qatysty mıkroorganızmderdi anyqtaǵan joq, al ınstıtýtta patogendermen jumys kezinde eshqandaı apat tirkelmegen.
Qyzmetker qaıtys bolǵannan keıin bılik birqatar epıdemıaǵa qarsy sharalar qabyldady. Onymen baılanysta bolǵan 200-ge jýyq adam medısınalyq baqylaýda. Irkýtsk oblysynyń gýbernatory Igor Kobzevtiń aıtýynsha, olarda asa qaýipti ınfeksıanyń belgileri tabylmaǵan.
Reseıdegi ahýal iri sheteldik BAQ-tyń nazaryn aýdardy. Obaǵa qarsy ınstıtýt qyzmetkeriniń qaıtys bolýy jáne odan keıingi karantındik sharalar týraly Reuters, Associated Press, Financial Times, The Guardian, The Washington Post jáne basqa da basylymdar jazdy. Bul rette sheteldik BAQ reseılik bıliktiń «oba» dıagnozyn rastamaǵanyn, alaıda bolǵan oqıǵanyń kóptegen mán-jaıy áli de túsiniksiz ekenin atap ótedi.
AQSh ta bolyp jatqan jaǵdaıdy qadaǵalap otyr. Donald Tramp ákimshiliginiń ókili Axios-qa Aq úıdiń yqtımal indet týraly habarlamalardan habary bar ekenin, ahýaldy baqylap, odan ári qabyldanýy múmkin sharalardy baǵalap jatqanyn málimdedi. AQSh memlekettik hatshysy Marko Rýbıo ahýal nazar aýdarýdy qajet etetinin, biraq ázirge alańdaýǵa negiz joq ekenin aıtty.
Buǵan deıin «Kýrsıv» oba indetiniń yqtımal órshýi týraly qaýeset obaǵa qarsy ınstıtýt qyzmetkeriniń qaıtys bolýy men Irkýtsk oblysyndaǵy medısınalyq mekemelerdegi karantınnen keıin paıda bolǵanyn jazǵan edi.
Sonymen qatar oba týraly qaýesetke baılanysty dúrbeleń Qazaqstanǵa da jetti. Keshe Dezinformasıaǵa qarsy kúres ortalyǵy 21 qyrkúıekte Almatydaǵy Masǵut Aıqymbaev atyndaǵy asa qaýipti ınfeksıalar ulttyq ǵylymı ortalyǵynda bolǵan órtti Reseıdegi oba jaǵdaıy týraly resmı rastalmaǵan qaýesetpen manıpýlátıvti túrde baılanystyrý áreketteri týraly eskertti.