Qazaqstandaǵy alǵashqy lısenzıalanǵan krıptoaıyrbastaý ortalyǵy Pax Finance mıllıarder Vácheslav Kımge tıesili Alatau City Bank mobıldi qosymshasymen ıntegrasıalanǵanyn habarlady. Osynyń arqasynda bank klıentteri Pax Finance platformasyndaǵy shotyn bank kartasy arqyly tikeleı qosymshadan toltyra alady, dep habarlaıdy infohub.kz saıty.
Kompanıadaǵylardyń aıtýynsha, paıdalanýshylarǵa endi úshinshi tarap saıttaryna ótýdiń nemese derektemelerdi qolmen engizýdiń qajeti joq. Shotty toltyrý bank ekojúıesiniń ishindegi ıntegrasıalanǵan servıs arqyly júzege asady. Barlyq operasıalar klıentterdi sáıkestendirý jáne tekserý rásimderin saqtaı otyryp, lısenzıalanǵan platforma arqyly ótedi.
Pax Finance bas dırektory Aslan Beispekov ıntegrasıa Qazaqstanda sıfrlyq aktıvter úshin zańdy ınfraqurylymdy damytý strategıasynyń bóligi ekenin aıtty.
«Biz memleket basshysynyń Qazaqstandy Ortalyq Azıanyń krıpto-habyna aınaldyrý jónindegi tapsyrmasyn júzege asyryp jatyrmyz. Alatau City Bank-pen ıntegrasıa – sıfrlyq aktıvtermen jumys isteý úshin barynsha yńǵaıly jáne zańdy ınfraqurylym qurý strategıamyzdyń bir bóligi», – dedi ol.
Alǵashqy kezeńde paıdalanýshylar fıat aqshany sıfrlyq aktıvterge jyldam aýdara alady. Kelesi qadamda kompanıa eki baǵytta da operasıalar ýaqytyn qysqartý úshin qarajatty jyldam shyǵarýdy iske qosýdy josparlap otyr.
Eske salaıyq, shilde aıynyń basynda Ulttyq bank Pax Finance-ke Qazaqstan tarıhyndaǵy alǵashqy krıptoaıyrbastaý ortalyǵy lısenzıasyn berdi. Ol kompanıaǵa sıfrlyq aktıvterdi resmı túrde satyp alýǵa, satýǵa jáne saqtaýǵa, sondaı-aq bólimsheler ashýǵa jáne krıptomattar ornatýǵa múmkindik beredi.
Pax Finance 2026 jyldyń mamyrynda Astanada tirkeldi. Onyń quryltaıshylary qatarynda – qarjyger ári Finmentor.kz Telegram-arnasynyń avtory Arman Bataev, Qazaqstandaǵy krıptoındýstrıanyń alǵashqy qatysýshylarynyń biri Azat Bekmaǵambetov jáne kásipker Oryngýl Esjanova bar.
Alatau City Bank-ti Kaspi.kz teń ıesi Vácheslav Kım baqylaıdy. Forbes baǵalaýy boıynsha, onyń baılyǵy $7,8 mlrd quraıdy, bul ony Qazaqstandaǵy eń baı kásipker etedi.