Reseılik kompozıtor Igor Krýtoı áleýmettik jelide qazaqstandyq ánshi, «Jańa tolqyn-2025» baıqaýynyń jeńimpazy Alex Lim-men túsirilgen jańa beıneni jarıalady. Jazbada qazaqstandyq ánshi maestronyń súıemeldeýimen án salyp tur, dep habarlaıdy infohub.kz saıty.
«Sasha únemi ekeýmiz roıalimniń súıemeldeýimen meniń ánderimnen tutas álbom jasaýymyz kerektigin aıtady, al maǵan orkestrdiń úni kóbirek unaıdy... Al meniń qymbatty jazylýshylarym qalaı oılaıdy?» — dep joldady Krýtoı óz jankúıerlerine.
Kompozıtordyń jazylýshylary bul jazbaǵa belsendi ún qatty. «50-ge 50 usynamyn, jartysy orkestrge, jartysy roıálge», — dep jazdy bir qoldanýshy. Taǵy bir pikir: «Sashanyń ıdeıasy tamasha, bul keremet bolar edi. Bul týraly sizge eshqashan jazbaǵanmyn, biraq ishimde Dımashpen osyndaı kollaborasıa jasaýdy armandadym. Saýsaqtaryńyzdyń ekspromttary esińizde me? Ol sıqyrly edi». Sondaı-aq: «Eki talantty adam! Ómir sizderdi tegin biriktirmegen», — degen pikir aıtyldy. Taǵy bir jazylýshy áserimen bólisti: «Qandaı ádemi. Pavlodardaǵy konsertte boldym, qatty unady, sýper».