19 shildede Kaspı qubyr konsorsıýmynyń teńiz termınalyndaǵy VPÝ-1 jáne VPÝ-3 syrtqy aılaq qurylǵylarynda tıeý jumystary kezinde eki munaı tankeri ushqyshsyz ushý apparattarynyń shabýylyna ushyrady. Bul týraly infohub.kz habarlady.
QQK málimetinshe, shabýylǵa «Tengızshevroıl» («Shevron») kompanıasynyń munaıyn tasymaldaǵan «ASIA» tankeri jáne «Kashagan B.V.» men «Maten» («QazMunaıGaz» UK AQ) kompanıalarynyń munaıy júktelgen «NISSOS IOS» tankeri ushyraǵan. Bul kemeler tıisinshe Lıberıa men Marshall araldarynyń týy astynda júzedi, ekıpajdar halyqaralyq.
Shabýyl saldarynan «ASIA» tankerinde órt shyqty. QQK-niń avarıalyq-qutqarý kúshteriniń kómegimen órtti sóndirýge qol jetkizildi. Tıeý jumystary toqtatyldy.
QQK kompanıa qyzmetkerleri, merdiger uıymdar men ekıpaj músheleri arasynda zardap shekkender joq ekenin habarlady. Munaı tógilýine jol berilmegen, ekıpajdar medısınalyq kómek suramaǵan. Eki tanker de sý ústinde qaldy, mamandar keltirilgen zaqymdy baǵalap jatyr.
Kompanıa bolǵan oqıǵany QQK-niń azamattyq nysandary men teńiz termınaly akvatorıasyndaǵy kemelerge jasalǵan shabýyl dep baǵalaıtynyn málimdedi. Konsorsıýmnyń aqparatyna sáıkes, bul – tek azamattyq maqsattaǵy jáne halyqaralyq quqyq qorǵaýyndaǵy QQK nysandaryna jasalǵan tikeleı shabýyldyń besinshi jaǵdaıy.
Kaspı qubyr konsorsıýmy Reseı, AQSh, Qazaqstan jáne birqatar eýropalyq elderdiń otyn-energetıka kesheniniń iri kásiporyndaryn biriktiredi.
QQK Qazaqstannyń iri ken oryndary – Teńiz, Qashaǵan jáne Qarashyǵanaqtan munaı tasymalyn qamtamasyz etedi. 2025 jyly júıe arqyly shamamen 70,5 mln tonna munaı ótkizildi, onyń 75%-dan astamy sheteldik júk jóneltýshilerge tıesili, olardyń ishinde «Tengızshevroıl» («Shevron»), «EksonMobıl», «QazMunaıGaz» UK AQ, «Enı» jáne «Shell» bar.