Reseı men Qazaqstan Kaspı qubyr konsorsıýmy (KTK) nysandarynyń fızıkalyq qaýipsizdigin qamtamasyz etý úshin birlesip jumys istep jatyr. Bul týraly Reseı Syrtqy ister mınıstrligi TMD elderi jónindegi úshinshi departamentiniń dırektory Aleksandr Sternık málimdedi, dep habarlaıdy infohub.kz saıty.
Reseılik dıplomattyń aıtýynsha, Novorossıskidegi teńiz termınalyn qosa alǵanda, KTK ınfraqurylymyn qorǵaý máselesi qazaqstandyq seriktestermen kelissózder kún tártibinde turaqty tur. Ol atap ótkendeı, konsorsıým nysandaryna jasalǵan teraktiler olardy qatty alańdatady.
«Novorossıskidegi teńiz termınalyn qosa alǵanda, KTK nysandarynyń fızıkalyq qaýipsizdigin qamtamasyz etý máselesi konsorsıým nysandaryna jasalǵan teraktilerden qatty alańdaǵan qazaqstandyq seriktestermen turaqty talqylanyp otyrady. KTK-niń batys aksıonerlerimen baılanys arqyly qubyrdyń jumys isteýin qamtamasyz etý úshin birlesken sharalar qabyldap jatyrmyz», — dep keltiredi onyń sózin RIA Novostı.
Sternık Kaspı qubyr konsorsıýmy jumysyndaǵy irkilister álemdik naryqqa energıa tasymaldaýshylardyń turaqty jetkizilimine aıtarlyqtaı zıan keltiretinin jáne búkil álemde otyn baǵasynyń ósýine ákelýi múmkin ekenin atap ótti.
Dıplomat 2025 jyldyń aqpanynan bastap KTK nysandary men qazaqstandyq munaı tasymaldaıtyn tankerlerge udaıy ushqyshsyz ushaqtar soqqy berip jatqanyn eske saldy. Tek osy jyly segiz osyndaı shabýyl tirkelgen. Barlyq jaǵdaıda batys alýshylarǵa arnalǵan shıkizat tasymaldanǵan.
«Kóptegen sheteldik kóshbasshylardyń "ushqyshsyz" shabýyldardyń baqylaýsyz órshýine alańdaýshylyq bildirýi zańdy», — dep qorytyndylady Aleksandr Sternık.