Qazaqstan munaıyn tıeý aldynda KTK mańynda taǵy bir tanker shabýylǵa ushyrady

Qara teńiz jaǵalaýyndaǵy Kaspı qubyr konsorsıýmy (KTK) termınalynda munaı tıeýge daıyndalyp jatqan Nordic Zenith tankeri ushqyshsyz ushatyn apparattardyń shabýylyna ushyrady. Shıkizatty tıeý jospary buzyldy, dep habarlaıdy infohub.kz saıty.

Nordic Zenith kemesi eki túngi dron shabýylynan keıin órtenip ketti. Órt ekıpaj kúshimen sóndirildi. KTK konsorsıýmynyń kemeleri tankerden 13 adamdy evakýasıalady, taǵy toǵyz adam bortta qaldy. Tańerteń kemege munaı tıeý bastalýy kerek edi, biraq shabýyldan keıin ol tıeýge jaramsyz bolyp qaldy.

KTK — Qazaqstan munaıyn Novorossısk arqyly Eýropaǵa jetkizýdiń negizgi baǵyty. Qubyrlar arqyly tasymaldanatyn Qazaqstan munaıynyń 80% KTK ınfraqurylymynan ótedi. Nordic Zenith tankeri Suezmax klasyna jatady (tolyq júkpen Sýes kanalynan óte alady). Ol Lıberıa týymen júzedi. Keme Stambýl portynan 10 shildede shyqty.

Eske salaıyq, amerıkandyq Chevron kompanıasynyń munaı tankeri, KTK termınalynan Qazaqstan munaıyn tasymaldaý úshin paıdalanylǵan, 8 shildede ushqyshsyz ushaqtarmen shabýylǵa ushyrady. KTK aksıonerleri — reseılik «Transneft» (24%), «KazMunaıGaz» (19%), amerıkandyq Chevron (15%), reseılik «Lýkoıl» (12,5%), amerıkandyq ExxonMobil (7,5%), «Rosneft-Shell Kaspıen Venchýrs Lımıted» (7,5%), reseılik «MK KTK Kompanı» (7%) jáne ıtalıalyq Eni (2%).