Kaspı qubyr konsorsıýmynyń (KTK) Novorossısk mańyndaǵy termınalyna ushqyshsyz ushý apparattary men teńiz drondarynyń shabýyly saldarynan taǵy eki tanker munaı tıeı almady. Bul termınal arqyly qazaqstandyq munaı eksportynyń 80 paıyzdan astamy ótedi, dep habarlaıdy inbusiness.kz The Moscow Times-ke silteme jasap.
Beısenbide túnde eki keme júk tıemeı termınal aýdanynan ketýge májbúr boldy. Derekkózderdiń aıtýynsha, «Lýkoıl» kompanıasynyń munaıyn tıeýge arnalǵan HERA tankeri shabýyl kezinde zaqymdanǵan. «QazMunaıGaz» ulttyq kompanıasynyń shıkizatyn tıeýi tıis ALATAU tankeri zaqymdanbaǵanymen, ekıpajsyz katerler qaýpine baılanysty baǵytyn ózgertken.
Kemelerdi baqylaý júıesi LSEG dereginshe, HERA 20 shildede Bosfordan Qara teńizge shyqqannan keıin transponderin óshirgen. Keme beısenbi tańerteń Novorossıskige jetýdi josparlaǵan. 19 shildeden beri termınalǵa bet alǵan ALATAU keıin Stambýl jaqqa baǵytyn ózgertip, ornalasqan jeri týraly derekterdi de berýdi toqtatqan.
Beısenbi tańerteń taǵy eki tanker — SEA AMBER jáne DELTA IOS — KTK termınalyna kirýden bas tartyp, Túrkıa jaǵalaýyna bet alǵan, dep habarlaıdy LSEG.
KTK bul jaǵdaıǵa túsinikteme bermeıdi. Ǵaryshtyq sýretter beısenbi tańerteń termınal mańynda birde-bir tankerdiń bolmaǵanyn kórsetken.
Bul sońǵy aıdaǵy alǵashqy oqıǵa emes. Shilde aıynda Novorossısk mańyndaǵy Ońtústik Ozereevkadaǵy KTK teńiz termınalyna ushqyshsyz ushý apparattary shabýyl jasap, bes tanker zardap shekti. 20 shildedegi shabýyldardyń birinen keıin konsorsıým munaı tıeýdi ýaqytsha toqtatqanyn málimdedi.
Qazaqstan Energetıka mınıstrligi qazaqstandyq munaıdyń álemdik naryqqa turaqty eksportyn tezirek qalpyna keltirý úshin sheshim izdeý boıynsha úzdiksiz konsýltasıalar júrgizilip jatqanyn habarlady.
Kaspı qubyr konsorsıýmy qazaqstandyq munaıdyń negizgi eksporttyq baǵyty bolyp qala beredi. Onyń ınfraqurylymy arqyly eldiń munaı eksportynyń 80 paıyzdan astamy, sonyń ishinde Teńiz, Qashaǵan jáne Qarashyǵanaq sıaqty iri ken oryndarynyń shıkizaty Ońtústik Ozereevkadaǵy termınal arqyly tankerlerge tıeledi.