Qazaqstan temirjoldarynda aýqymdy sıfrlyq transformasıa júredi: LTE-R jelisin, jasandy ıntellektti jáne zamanaýı kıberqorǵanys júıelerin engizý josparlanýda. Bul jáne basqa da ınovasıalar «Qazaqstan temir joly» UK» AQ (QTJ) men qytaılyq Huawei kompanıasynyń áriptestigi aıasynda júzege asyrylmaq, dep habarlaıdy infohub.kz saıty.
QTJ basqarma tóraǵasy Eljas Otynshıev Huawei kompanıasynyń korporatıvtik satý jónindegi aǵa vıse-prezıdenti Leo Chenmen kezdesti. Taraptar yntymaqtastyq qorytyndysyn shyǵaryp, salanyń sıfrlyq ınfraqurylymyn damytýdyń kelesi qadamdaryn belgiledi.
Negizgi jobalardyń biri — temirjol kóligine arnalǵan arnaıy symsyz baılanys júıesi LTE-R jelisin engizý. Ol derekterdi turaqty jetkizýdi qamtamasyz etip, poıyzdar qozǵalysyn naqty ýaqyt rejıminde úılestirýdi jaqsartady.
Sonymen qatar, QTJ men Huawei Huawei tehnologıalaryn qamtıtyn zamanaýı esepteý sheshimderimen jabdyqtalǵan Derekterdi óńdeý ortalyǵyn (DÓO) qurýdy talqylaýda. Bul tasymaldaýdy basqarý úshin analıtıkalyq júıeler men jasandy ıntellektti engizýge múmkindik beredi.
Taǵy bir baǵyt — Intellektýaldy basqarý ortalyǵyn (IOC) iske qosý. Ol tehnologıalyq prosesterdi naqty ýaqyt rejıminde baqylaýǵa, derekterdi vızýalızasıalaýǵa jáne temirjol jelisin jedel basqarýǵa múmkindik beredi.
QTJ-nyń sıfrlyq ınfraqurylymyn qorǵaýǵa erekshe nazar aýdarylady. Zamanaýı aqparattyq qaýipterge qarsy turatyn arnaıy Kıberqaýipsizdik ortalyǵyn qurý josparlanýda.
QTJ-da Huawei-men áriptestik kompanıaǵa temirjoldardy sıfrlandyrýdy jedeldetý úshin halyqaralyq tájirıbe men ozyq tehnologıalardy paıdalanýǵa múmkindik beretinin atap ótti.
Buǵan deıin Qazaqstan temirjol salasyn jańǵyrtýdyń jańa sıkline kirisetini habarlanǵan bolatyn. Sońǵy 15 jylda eldiń kólik sektoryna salynǵan ınvestısıalardyń jalpy kólemi shamamen 35 mlrd dollardy quraıdy. Sonymen qatar, amerıkandyq Wabtec kompanıasy aldaǵy jyldary Astanadaǵy zaýytynan 15 lokomotıvke deıin eksporttaýdy josparlap otyr.