2026 jylǵy 21 qyrkúıekten bastap Qazaqstanda «Qazaqstan temir joly» kompanıasy kórsetetin magıstraldyq temirjol jelisi qyzmetteriniń jańa tarıfteri kúshine enedi. Aldaǵy baǵa ósimi týraly Qazaqstandyq júk temirjol tasymaldaýshylarynyń qaýymdastyǵy habarlady, dep jazady infohub.kz saıty.
Qyzmet qunyn qaıta qaraýdyń quqyqtyq negizi Tabıǵı monopolıalardy retteý komıtetiniń 2026 jylǵy 2 qyrkúıektegi buıryǵy boldy. Bul qujat QTJ-nyń magıstraldyq temirjol jelisi qyzmetterine buryn bekitilgen tarıfterge ózgerister engizedi.
Bekitilgen parametrlerge sáıkes, 2026–2027 jyldary ósim 23–24%-dy quraıdy. Odan keıin tarıfterdiń ósý qarqyny birtindep baıaýlaýǵa tıis: 2028 jyly 22%-ǵa, 2029 jyly 20%-ǵa ulǵaıtý kózdelgen, al 2030 jylǵa qaraı ósim 18% bolýy tıis.
Sonymen qatar ózgerister tasymaldardyń barlyq sanatyn qamtymaıdy. Áleýmettik mańyzy bar azyq-túlik taýarlary úshin tarıfterdi buryn bekitilgen deńgeıde saqtaý týraly sheshim qabyldandy.
Magıstraldyq temirjol jelisi qyzmetteriniń jańa quny 21 qyrkúıekten bastap qoldanyla bastaıdy.
Aıta keteıik, QTJ úshin temirjol jolaýshylar tasymaly dástúrli túrde shyǵyndy bolyp keledi. Osy sebepti kompanıa jolaýshylar tasymalyn júk tasymalynan túsken kiris esebinen kros-sýbsıdıalaýǵa júginedi. Onyń ústine júk tasymalynyń ózinde tek jekelegen júkterdi — eksport pen tranzıt kezinde tasymaldaý ǵana paıdaly.