Kýbada bes jylǵa sottalǵan ataqty sýretshi Lýıs Manýel Otero Alkantara Amerıka Qurama Shtattaryna kelip, onda bosqyn retinde turaqtaýy kútilýde. Onyń kelgenin AQSh Memlekettik hatshysy Marko Rýbıo rastap, Kýba bıliginen taǵy 700 saıası tutqyndy bosatýdy talap etti, dep habarlaıdy infohub.kz saıty.
38 jastaǵy Otero Alkantara ulttyq rámizderdi qorlaý, bılikti qurmettemeý jáne qoǵamdyq tártipti buzý baptarymen bes jylǵa bas bostandyǵynan aıyrylǵan edi. Ol Kýbada kóbirek erkindik talap etken sýretshiler men zıaly qaýym ókilderiniń «San-Isıdro qozǵalysy» uıymynyń negizin qalaýshylardyń biri. Halyqaralyq Amnıstıa uıymynyń málimetinshe, bul qozǵalys músheleri Kýba bıliginiń turaqty qýdalaýyna ushyrap keledi.
«Erkin Kýbany armandaǵany úshin ol únemi qýdalanyp, tutqyndalyp, túrmege jabylyp otyrdy, biraq búgin ol bosqynda», — dedi Rýbıo. Ol sondaı-aq «ádiletsiz ustalǵan 700-den astam saıası tutqyndy dereý bosatýdy» talap etti. Quqyq qorǵaý uıymdary Kýba bıligin júzdegen saıası tutqyndy bosatýǵa birneshe ret shaqyrǵan.
Sońǵy jyldary AQSH-tyń Kýbaǵa ekonomıkalyq jáne dıplomatıalyq qysymy kúsheıip, eki el arasyndaǵy shıelenis órship keledi. Osy aptada AQSh Qazynashylyq departamenti Kýbanyń Týrızm mınıstrligine jáne týrızm salasymen baılanysty basqa da mekemelerge sanksıa saldy. Karıb araly úshin bul sala ekonomıkalyq mańyzǵa ıe. AQSh munaı blokadasy saldarynan Kýbanyń energetıkalyq ınfraqurylymy tolyqtaı derlik kúırep, júzdegen myń adam elektr qýatynsyz qaldy.
«Tramp ákimshiligi kýbalyq halyqtyń bostandyqqa umtylysyn qoldaýdy jalǵastyrady», — dedi Rýbıo.