Túrkistan oblysynda kúkirt qyshqyly zaýytyn salyp jatqan Taiqonyr Qyshqyl Zauyty kompanıasy depozıtter boıynsha syıaqy esebinen 103,9 mln teńge paıda tapty, dep habarlaıdy infohub.kz saıty.
2025 jyldyń qorytyndysy boıynsha kásiporyn 103,9 mln teńge paıda kórdi, al bir jyl buryn shyǵyn 818 myń teńgeni quraǵan edi. Kompanıa Túrkistan oblysynda jylyna 800 myń tonna kúkirt qyshqylyn óndiretin zaýyt qurylysy jobasyn júzege asyrýda.
Qurylys áli aıaqtalmaǵandyqtan, túsim men operasıalyq kirister joq, al ákimshilik shyǵyndar 86 mln teńgege jetti. Jınaq shottarynda ornalastyrylǵan salymdar boıynsha syıaqy 216 mln teńge kiris ákeldi. Kompanıanyń depozıtterinde 879 mln teńge saqtaýly.
Qurylysty memlekettik Qazaqstan Damý Banki qarjylandyrady. Nesıe jelisi boıynsha jalpy lımıt 85 mlrd teńgeni quraıdy, al jobanyń quny 113 mlrd teńgege baǵalanýda. 2025 jyldyń sońynda Taiqonyr Qyshqyl Zauyty QDB-dan jalpy somasy 37,7 mlrd teńge bolatyn úsh transh aldy. Nesıeler boıynsha paıyzdyq mólsherleme — 15,83%, óteý merzimi — 2033 jyldyń 30 qazanyna deıin.
2025 jyldyń mamyrynda «Qazatomprom» zaýyt qurylysyn aıaqtaý 2027 jyldyń birinshi toqsanyna josparlanǵanyn habarlaǵan bolatyn.
Taiqonyr Qyshqyl Zauyty kompanıasynyń 60% Asia Pipeline Services-ke, al 40% «Qazatompromnyń» enshiles qurylymy — «Qazatomprom – SaUran»-ǵa tıesili. Bastapqyda jobany «Qazatompromnyń» ózi júzege asyrǵan, biraq keıin ulttyq kompanıa óz úlesiniń bir bóligin bergen.
Qazir majorıtarlyq paket Asia Pipeline Services-ke tıesili, al ony óz kezeginde MQFA-da tirkelgen TSKZ Solutions ıelenedi. Sońǵysynyń jalǵyz ıesi — iri qurylys kompanıasy Qazaq Stroy. Qazaq Stroy-dyń negizin qalaýshysy jáne quryltaıshysy Nurlan Artyqbaev — Forbes-tiń Qazaqstandaǵy tiziminde 21-orynda, baılyǵy $508 mln.
Sonymen qatar, Taiqonyr Qyshqyl Zauyty esebi men Adata derekterine sáıkes, Qazaq Stroy-dyń resmı quryltaıshylary Nadejda Artyqbaeva — 95% (Artyqbaevpen týystyq baılanysy belgisiz) jáne Dmıtrı Lı (5%).
Buǵan deıin seriktesi Nurlan Artyqbaev bolyp tabylatyn jeke kompanıa Qazaq Kalium Ltd. 2025 jyldyń qorytyndysy boıynsha 1,2 mlrd teńge shyǵynǵa ushyraǵany habarlanǵan edi.