Jańa oqý jylynan bastap Qazaqstan mektepterinde «Quqyq negizderi» páni qaıta mindetti bolady. Bul týraly «Ana tili» gazetine bergen suhbatynda Oqý-aǵartý mınıstri Juldyz Súleımenova aıtty, dep habarlaıdy infohub.kz saıty.
«Bilim berý baǵdarlamalaryna zań men tártip qundylyqtaryn engizemiz. Máseleni ashyq aıtýymyz kerek: qazir oqýshylar arasynda quqyqbuzýshylyq áreketteri kóbeıip keledi. Munyń sebebine úńildik. Sóıtsek sońǵy jyldardaǵy keıbir reformalardyń saldary baıqalatyndaı. Mysaly, 2022 jyldan bastap joǵary synyptarda birqatar pánder tańdaý pánine aınalǵan. Onyń arasynda «Quqyq negizderi» de bar. Sonyń saldarynan kóptegen oqýshy bul pándi tańdamaǵan, ıaǵnı oqymaǵan. Demek, olar zań aldyndaǵy jaýapkershilikti tolyq túsinbeı ósip keledi. Bir jylda júz myńdaǵan túlek oqý bitiretinin eskersek, qanshama oqýshy quqyq pen zań uǵymynan alshaqtap ketkenin baǵamdaýǵa bolar. Sondyqtan jańa oqý jylynan bastap «Quqyq negizderi» pánin qaıtadan mindetti pán retinde engizemiz. Buǵan qosa, 5–7-synyptarda «Konstıtýsıa negizderi» páni oqytylady. Bul bastamaǵa ártúrli pikir aıtyldy. Biraq bizdiń ustanymymyz ózgermeıdi. Bala zańdy qurmetteýdi sóz júzinde emes, onyń mánin túsiný arqyly úırenýi kerek. Zańǵa baǵynýdyń, zańdy saqtaýdyń, quqyǵyn bilýdiń mańyzyn mektepten meńgerýi qajet», — dedi mınıstr.