Astana mańyndaǵy kúnbaǵys alqabyndaǵy tanymal fotosessıalar egistiktiń taptalyp ketýine sebep boldy. Elordalyq fotograf Dmıtrı Bronnıkov áserli sýretke túskisi keletinderdiń leginen keıin lokasıanyń qandaı kúıge túskenin kórsetti, dep habarlaıdy infohub.kz saıty.
Fotograf kadrlardy Instagram-da bólisti. Onda myjylǵan jáne zaqymdalǵan ósimdikter men kúnbaǵystardyń arasynda taptalǵan jerler kórinedi. Onyń aıtýynsha, ádemi kadr úshin keıbir kelýshiler saldaryn oılamastan egistiktiń ishine tereńdeı kiredi.
«Kúnbaǵysta túsirilim. Óziń tapta, basqaǵa da múmkindik ber. Jalpy, is kúnbaǵys alqabynda boldy, biraq ony jaı ǵana taptap tastady. Árıne, men túsinemin, kún batqanda ádemi kadr túsirgiń keledi, sulýlyq pen ádemilik. Biraq nege egistikke tankpen kirý kerek?» — dep jazdy fotograf.
Ol tabıǵatqa degen mundaı qatynasty keıbir túsirý toptarynyń stýdıada ózderinen keıin retsizdik qaldyrý ádetimen salystyrdy. «Medıa toptarda stýdıany túsirilimnen keıin jınamaý úrdisi bar. Tamaqtandy, turdy da ketti. Jaı ǵana oı. Endi ádemi sýretterdiń artynda ne jatqanyn oılańyzdar. Mahabbat ta, saǵynysh ta, ar-ujdan da joq», — dep qosty Bronnıkov.
Vıdeonyń astyndaǵy pikirlerde keıbir qazaqstandyqtar mundaı minez-qulyq barlyq fotograftarǵa tán emes ekenin atap ótti. «Kásibı fotograftar muny eshqashan jasamaıdy, óıtkeni olar mundaı jerlerge taǵy da kelýi múmkin. Muny bir ret kelip, telefonǵa túsirip, ketip qalatyndar jasaıdy», — dep jazdy oqyrmandardyń biri.
Al polısıa Astana-Shýchınsk tas jolyndaǵy egistikte fotosessıa úshin kóligin jol jıegine tastap ketken júrgizýshilerdi aıyppulmen jazalap jatyr. Gúldeý maýsymy bastalǵaly mundaı buzýshylyq úshin 25-ke jýyq avtokólik ıesi jaýapqa tartyldy.