(Genrıh Geıneden)
Tolqyndaǵan darıaǵa
Qyzaryp ottaı kún batar.
Juqa, aqshyl bulttar
Qurmet qyp ony uzatar.
Qarsyda, qara bulttan
Qaıǵyly appaq týar Aı.
Tumandy kókte jybyrlar
Juldyzdar usaq ushqyndaı.
Baıaǵy erte zamanda
Bularda artyq baq bolǵan.
Aı áıel bop, Kún - eri,
Tolyqsyp turǵan shaq bolǵan.
Nurlary balqyp ekeýi
Qosylysqan bir mezgil.
Aınala juldyz - balalary -
Jaınaǵan óńsheń almas gúl.
Jaınatyp baqytyn qoımaǵan,
Ótirik, ósek jaıylǵan.
Kórmesteı ǵyp bir-birin,
Dushpan qyp bulardy aıyrǵan.
Osy kúnde tákappar
Kún kókte jalǵyz jaınaıdy.
Sáýlesine altyn máz bolyp,
Kún uzyn kókte oınaıdy.
Baqyty mol adamdar,
Kórmegen qasiret jamylyp,
Oǵan esh zat teń kelmes,
Táńiri qyp hatta tabynyp.
Tún bolsa, appaq qaıǵyly
Qorqyp qana Aı týar.
Apalap ergen artynda
Balalary - jetim juldyzdar.
Baqytsyz, janǵan jas qyzdar
Qaıǵyda ony es kórer:
Muńyn jyrlap aýlaqta,
Ashshy, ystyq jas tóger.
Aınymas áıel kóńilmen,
Aıbyndy Kún kúıeýin -
Umytqan joq Aı sorly
Áli kúnge súıýin.
Keshki mezgil kóp ýaqyt
Dirilder, qorqar, aǵarar.
Juqa bir bult astynan
Batqan Kúnge ol qarar.
Júregi janyp muńaıyp,
Kózinen Kúndi batyrad.
Aıtatyndaı ótinip:
«Toqta!- dep,- balalar shaqyrad».
Tákappar Kún qaramas
Muńdy Aıdyń túsine.
Onan jaman qyzarar,
Ashý syımaı ishine.
Aıypsyz Aıǵa qaramaı,
Jatary baryp tul tósek.
Kún men de Aıdy aıyrǵan
He qylmas deısiń bul ósek!

---