Burqyrap qara daýyl soǵyp turǵan,
Kókoraı túsi qashyp solyp turǵan.
Shydamaı qatty yzǵarly jel ótine,
Búrisip aǵash, shópter tońyp turǵan.
Kórik joq oıda-qyrda shyǵyp júrseń,
Estilmes qus, qurt daýsy qulaq túrseń.
Qaqtanǵan, jamyla túsip, ot mazdatyp,
Kóresiń kempir-shaldy úıge kirseń.
Masatydaı qulpyrǵan jerdiń júzi,
Aıaq bassań - tabanǵa óter syzy.
Kempir bolǵan bet-aýzy qatparlanyp,-
Burańdaǵan keshegi sulý qyzy.
Qysqasy, jer júzinde kórik bitken,
Qaraǵan da, sulý qyz qaıta ketken.
Jylamsyrap, muńaıyp jandy-jansyz,
Qatty aıazdy, qaıyrymsyz qysty kútken.
Osy ýaqyt shaharǵa tursań qarap,
Túrli jurt túrli iste júrgen tarap,
Kóshe boılap, oqýǵa shapshań basyp,
Shattyqpen jas balalar boqsha arqalap.
Qys, kúz bolmas olarǵa kóńilsiz shaq,
Oqý bilip, aıyrar qara men aq.
Ónerlengen dúnıege usta bolǵan,
Qoldarynda olardyń táj benen taq.
Qarasań sonda qazaq arasyna,
Oınaǵan jalań aıaq balasyna,
Ketedi ish eljirep, janyp-kúıip,
Kóńildiń tuz sepkendeı jarasyna.
Jas emir nadandyqta ótken bosqa,
Oqymaı, óner qýmaı jazy-qysta.
Bilimnen at-tonymen qashqan qazaq
Saılaýǵa talasýǵa qandaı usta.
Balasyn oqytýmen joq jumysy,
El buzý, malyn shashý - barlyq isi.
Oılaǵan bir kún buryn tańdaǵy isti,
Iapyrym-aý, aıtsańdarshy, bar ma kisi?
Basqa jurt balalary oqý qýǵan,
Bilimmen óz jurtynyń betin jýǵan.
İship-jep, bosqa júrse haıýan maldaı,
Adamzat jer júzine ne úshin týǵan?!
Qor boldyq, óner qýmaı, qaıran elim!
Kúsh ketip, talaı jannan kórdik kerim.
Sulyq bop, jan shyqqaly tur taıaýlap,
Mańdaıdan shyp-shyp shyǵyp elim teriń.

---