Qazaqstandyq dzúdoshy Gýsman Qyrǵyzbaev 2026 jylǵy jazǵy Azıa oıyndarynda qola medal úshin beldesýde jeńilip, tuǵyrdan bir qadam qalǵanda toqtady, dep habarlaıdy infohub.kz saıty.
66 kelige deıingi salmaq dárejesinde úshinshi oryn úshin beldesýde Qazaqstan ulttyq quramasynyń ókili Qytaıdan kelgen Szyıan Súemen kezdesti. Negizgi ýaqyt jeńimpazdy anyqtaı almady, sondyqtan beldesý qosymsha Golden Score kezeńine ótti.
Sheshýshi sát 7 mınýt 3 sekýndta tirkeldi: qytaılyq dzúdoshy «ıýko» baǵasyn alyp, jeńiske jetti. Osylaısha, Qyrǵyzbaev Azıada-2026 medalinen bir qadam qalǵanda toqtady.
Azıa oıyndary-2026 qola júldesi úshin 52 kelige deıingi salmaq dárejesindegi beldesýde qazaqstandyq Merýert Sarsenova japonıalyq dzúdoshy Kokoro Fýdzıshıromen kezdesti. Beldesý qosymsha ýaqytta qarsylastyń jeńisimen aıaqtaldy, Sarsenova besinshi orynmen shekteldi.
Buǵan deıin Azıa oıyndarynyń kúmis medaldaryn 60 kelige deıingi salmaq dárejesinde Eldos Smetov jáne 48 kelige deıingi dıvızıonda Abıba Abýjakynova jeńip alǵan bolatyn.