Qyrǵyzstan Mınıstrler Kabıneti benzın men dızel otynyn elden shyǵarýǵa merzimsiz tyıym saldy, dep habarlaıdy infohub.kz saıty.
Kórshiles respýblıka bıligi munaı men munaı ónimderin shyǵarý erejelerin ózgertti. Endi eksporttyq shekteý naqty kúnge deıin emes, merzimsiz áreket etedi. Ol ishki naryqty tolyq otynmen qamtamasyz etkenshe nemese Eýrazıalyq ekonomıkalyq odaqtyń biryńǵaı otyn naryǵy iske qosylǵansha jalǵasady. Tyıym benzın men dızel otynyn avtomobıl jáne temirjol kóligimen shyǵarýǵa qatysty.
Mazýt, nafta jáne pesh otynyn tek Úkimettiń jeke sheshimi boıynsha shyǵarýǵa bolady. Bul ónimder shetelde óńdelip, daıyn ónim Qyrǵyzstanǵa qaıtarylýy kerek. Shekteý avtomobıl bagyndaǵy otynǵa qoldanylmaıdy.
Qyrǵyzstan Reseıden benzın jetkizilimi toqtap, otyn daǵdarysyna tap boldy. Reseı Qyrǵyzstanǵa janar-jaǵar maı ımportynyń 90 paıyzyna deıin qamtamasyz etetin. Máskeý ýkraındyq ushqyshsyz ushaqtardyń munaı óńdeý zaýyttaryna birqatar shabýylynan keıin otyn shyǵarýdy shektedi. Maýsym aıynyń sońynda Qyrǵyzstannyń janarmaı quıý beketterinde benzın tapshylyǵy baıqaldy.
Qyrǵyzstan basqa memleketterden, sonyń ishinde Qazaqstannan kómek surady. Resmı Astana ekiushty jaýap berdi, biraq Bishkek Qytaı men Belarýsten otyn jetkizýge kelisim jasaı aldy. Qazaqstan-Qyrǵyzstan shekarasynda Qazaqstannan zańsyz benzın shyǵarýǵa baılanysty shıelenis te týyndady.
Ótken aptada Qyrǵyzstan otyn daǵdarysyna baılanysty AI-95 benzınine memlekettik baǵa retteýdi joıdy.