Qyrǵyzstanda «75-tiń isi» dep atalyp ketken qylmystyq is boıynsha sot úkim shyǵardy. İstiń basty fıgýranty — Qyrǵyzstan Ulttyq qaýipsizdik memlekettik komıtetiniń burynǵy tóraǵasy Kamchybek Tashıev, dep habarlaıdy infohub.kz.
NUR.KZ saıty 24.kg-ge silteme jasap habarlaǵandaı, Bishkek qalalyq soty «75-tiń haty» isin jabyq esik jaǵdaıynda qarady. Alaıda buǵan deıin buqaralyq aqparat quraldarynyń ókilderi sot zalyna jiberiletini málimdelgen edi.
Sot otyrysynyń qorytyndysy týraly advokat Latypbek Nýralımov habarlady. Onyń aıtýynsha, is Qyrǵyz Respýblıkasy Qylmystyq kodeksiniń 326-baby «Bılikti kúshpen basyp alý» sanatynan 195-bap «Saılaý quqyqtaryn júzege asyrýǵa kedergi keltirý» boıynsha qaıta saralandy.
«Barlyq aıyptalýshy tórt jylǵa bas bostandyǵynan aıyryldy, oǵan qosa eki jylǵa probasıalyq qadaǵalaý taǵaıyndaldy», — dedi advokat.
Aıta keteıik, Qyrǵyz Respýblıkasy Qylmystyq kodeksiniń osy baby boıynsha múlikti tárkileý qarastyrylmaǵan. Buǵan deıin aýdandyq sottyń úkiminde múlikti tárkileý týraly talap bolǵan.
Eske salaıyq, buǵan deıin Bishkek soty UQMK burynǵy tóraǵasy Kamchybek Tashıevti «75-tiń haty» isi boıynsha kináli dep tanyǵan. Oǵan tórt jyl bas bostandyǵynan aıyrý jazasy múlikti tárkileýmen qosa taǵaıyndalyp, biraq úsh jyldyq probasıalyq qadaǵalaý belgilenip, jazany óteýden bosatylǵan. Dál osyndaı úkimder respýblıkanyń basqa da burynǵy joǵary laýazymdy sheneýnikteri men saıasatkerlerine shyǵarylǵan.
Keıin memlekettik aıyptaýshy tarap pen qorǵaýshy tarap úkimge Bishkek qalalyq sotynda shaǵymdandy. Prokýrorlar barlyq fıgýrantqa toǵyz jyldan bas bostandyǵynan aıyrý jazasyn taǵaıyndaýdy surady.
Búgin jańa sheshim shyǵarylar aldynda UQMK burynǵy tóraǵasynyń advokaty Kamchybek Tashıevtiń aqtalý úkimine senimdi ekenin málimdedi.
Aǵymdaǵy jyldyń aqpanynda Kamchybek Tashıev Qyrǵyzstan UQMK tóraǵasy qyzmetinen bosatylǵan. Ol óziniń qyzmetten ketetinin kútpegenin aıtqan. Al el prezıdenti Kamchybek Tashıev memlekettik qyzmetke eshqashan qaıta oralmaıtynyn málimdegen.
Jaqynda Jogorký Kenesh depýtaty Elvıra Sýrabaldıeva suhbatynda Qyrǵyzstan UQMK burynǵy tóraǵasy Kamchybek Tashıev memlekettik tóńkeris jasaý áreketin uıymdastyrǵany úshin qyzmetten bosatylǵanyn aıtqan.
Kóp uzamaı Qyrǵyzstannyń úsh burynǵy joǵary laýazymdy sheneýnigine memlekettik tóńkeris jasaý áreketi boıynsha resmı aıyp taǵylǵany belgili boldy. Olardyń qatarynda UQMK burynǵy tóraǵasy Kamchybek Tashıev, burynǵy depýtat Kýrmankýl Zýlýshev jáne Jogorký Keneshtiń burynǵy tóraǵasy Nýrlanbek Týrgýnbek ýýlý bar.
Sóz aýyr sanattaǵy qylmystar týraly bolyp otyr. Olar jappaı tártipsizdikterdi uıymdastyrýmen jáne tergeý memlekettik tóńkeris jasaý áreketi dep qarastyratyn árekettermen baılanysty. Buqaralyq aqparat quraldarynda bul proses «75-tiń isi» dep ataldy. Ol osylaı ataldy, sebebi tergeý derekteri boıynsha ashyq hatqa 75 adam qol qoıǵan. Úndeýde Qyrǵyzstanda merziminen buryn prezıdenttik saılaý ótkizýge shaqyrýlar bolǵan.