Qyrǵyzstan men Ózbekstan eki eldi mekendi Ózbekstan quramynan Qyrǵyzstanǵa resmı berý boıynsha uıymdastyrý-tehnıkalyq jumystardy bastady, dep habarlaıdy infohub.kz saıty.
24.kg basylymy Qyrǵyzstan prezıdentiniń Batken oblysyndaǵy ókildigine silteme jasap, buryn Ózbekstannyń Ferǵana oblysyna qaraǵan Choń-Gara jáne Tash-Dóbó aýyldaryn resmı berý jumystary memlekettik shekarany demarkasıalaý jáne jer ýchaskelerimen almasý týraly kelisimder aıasynda júrgizilip jatqanyn habarlady.
Shilde aıynda eki eldiń birlesken jumys komısıasynyń kezekti otyrysynda beriletin aýmaqtar turǵyndarynyń azamattyq mártebesi, kóshirý, múlik, sharýashylyq qyzmet jáne basqa da uıymdastyrý máseleleri talqylandy.
Keshe, 3 tamyzda, birlesken jumys toby tikeleı aýyldarda jumys isteı bastady. Mamandar turǵyndardy tirkeýden ótkizip, qujattardy odan ári resimdeý tártibin túsindirýde.
Choń-Gara jáne Tash-Dóbó aýyldarynda negizinen etnıkalyq qyrǵyzdar turatyny atap ótiledi. Aldyn ala málimetter boıynsha, eki eldi mekenniń halqy shamamen 2,5 myń adamdy quraıdy.
Tirkeý aıaqtalǵannan keıin zańnamada kózdelgen turǵyndarǵa Qyrǵyzstan azamattyǵyn berý rásimi bastalady.
Onyń ornyna qyrǵyz tarapy Ózbekstanǵa aýdany boıynsha balamaly jer ýchaskelerin beredi.
Eske salaıyq, buǵan deıin Qyrǵyzstan Ózbekstanmen aýmaq almasýdan keıin eki aýyldyń el quramyna ótkenin habarlaǵan bolatyn. Sondaı-aq Bishkek Qazaqstanǵa da osyndaı usynys joldady.