Qazaqstanda qyrkúıek qarama-qaıshylyqpen bastalady: batys pen ońtústikte jazǵy ystyq +35 gradýsqa deıin saqtalsa, soltústik, shyǵys jáne ortalyq aımaqtarda jaýyn-shashyn, keı jerlerde qar aralas jańbyr kútiledi. Túnde alǵashqy aıazdar bolýy múmkin, dep habarlaıdy infohub.kz saıty.
«Qazgıdromettiń» konsýltatıvtik boljamy boıynsha, qyrkúıektegi ortasha temperatýra tamyz aıynan 5–7 gradýsqa tómen bolady. Degenmen, sınoptıkter aı basynda kúzdiń turaqty ornyǵýyn kútpeıdi.
Soltústik, ortalyq jáne shyǵys óńirlerde qyrkúıektiń alǵashqy kúnderi jaýyn-shashyn men ekpindi jel kútiledi. Túnde temperatýra keı jerlerde 0…+8 gradýsqa deıin tómendep, jer betinde -3 gradýsqa deıin aıaz bolýy múmkin.
Birinshi onkúndiktiń ortasyna qaraı aýa raıy ózgeredi: aýmaqtyń basym bóliginde jaýyn-shashyn toqtap, kúndiz aıtarlyqtaı jylynady. Soltústikte, shyǵysta jáne ortalyqta +10…+18°C-tan keıin temperatýra +22…+30°C-qa deıin kóterilýi múmkin. Batysta, soltústik-batysta jáne ońtústik-batysta aýa +25…+35°C-qa deıin jylynady. Ońtústikte kúndiz +25…+35°C, túnde +13…+20°C bolady. Ońtústik-shyǵysta +20…+28°C-tan keıin temperatýra +25…+33°C-qa deıin joǵarylaıdy.
Alaıda jylyný uzaqqa sozylmaıdy. Birinshi onkúndiktiń ekinshi jartysynda soltústik-batys sıklon aldymen batys pen soltústik-batysty, sodan keıin basqa aımaqtardy da qamtıdy. Onymen birge jaýyn-shashyn qaıta oralyp, jel kúsheıip, ystyq basylady.
Ekinshi jáne úshinshi onkúndikterde temperatýralyq aýytqýlar jalǵasady. Batysta jáne soltústik-batysta jyly kezeńderde +27…+35°C, al sýyǵan kezde +12…+22°C bolady. Túnde jer betinde qaıtadan -3 gradýsqa deıin aıaz bolýy múmkin.
Soltústikte, shyǵysta jáne ortalyqta kúndizgi temperatýra +20…+30°C-tan +8…+17°C-qa deıin aýytqıdy. Túnde termometr baǵandary keı jerlerde nólge jaqyndaıdy.
Ońtústikte jáne ońtústik-shyǵysta jyly kúnderi +25…+33°C saqtalady, alaıda kezekti sýytý kezinde temperatýra +15…+22°C-qa deıin tómendeıdi. Taýly aımaqtarda túngi aıaz -6°C-qa deıin jetýi múmkin.
Jalpy, Qazaqstannyń basym bóliginde qyrkúıek klımattyq normaǵa jaqyn bolady. Batys Qazaqstan oblysynda, sondaı-aq Atyraý oblysynyń batysy men Mańǵystaý oblysynda ádettegiden shamamen bir gradýsqa jyly bolýy múmkin.
Kóptegen aımaqtarda jaýyn-shashyn norma sheginde bolady dep kútilýde. Eldiń tym batysynda, soltústik-batysynda jáne soltústik-shyǵysynda ádettegiden kóp, al ońtústik pen ońtústik-batysta negizinen az jaýýy múmkin.