Qyzylordada sottar kámeletke tolmaǵan balalary bar áıeldi jylytý maýsymynda jaldamaly páterden shyǵarýdan qorǵady. Atqarýshylyq is júrgizý sýyq aıaqtalǵansha toqtatyldy. Bul sheshimdi barlyq sot ınstansıalary maquldady, dep habarlaıdy NUR.KZ.
İs materıaldaryna sáıkes, Qyzylordada áıel men onyń balalaryn jaldamaly turǵyn úıden shyǵarý týraly atqarýshylyq is júrgizý qozǵalǵan. Memlekettik sot oryndaýshysy jylytý maýsymy aıaqtalǵanǵa deıin toqtatý týraly qaýly shyǵardy. Buǵan kelispeı, talapker — «Qazaqstan turǵyn úı kompanıasy» AQ — qaýlyny zańsyz dep tanýdy jáne onyń kúshin joıýdy talap etip, sotqa júgindi. Talapker áıeldiń menshik ıesi emes, jaldaý sharty boıynsha turatynyn aıtty.
Birinshi jáne apelásıalyq satydaǵy sottar talapty qanaǵattandyrmaı, sot oryndaýshysynyń áreketin zańdy dep tanydy. Óz sheshimin negizdeý úshin olar Bala quqyǵy týraly konvensıaǵa, bala múddesin basym qorǵaý qajettiligine, sondaı-aq izgilik, ádildik jáne parasattylyq qaǵıdattaryna silteme jasady.
Ákimshilik ister jónindegi kasasıalyq sot mán-jaılardy zerdeleı kele, atqarýshylyq is júrgizýdiń kámeletke tolmaǵan balalary bar otbasyna qatysty qozǵalǵanyn anyqtady. Zań boıynsha jylytý maýsymynda áleýmettik osal azamattardy, balaly otbasylardy jáne I nemese II top múgedekterin jalǵyz turǵyn úıden shyǵarýǵa tyıym salynǵan. «Atqarýshylyq is júrgizý jáne sot oryndaýshylarynyń mártebesi týraly» Zań mundaı is júrgizýlerdi toqtatýdy tikeleı mindetteıdi.
Kasasıa sondaı-aq taraptar arasynda buryn satyp alý quqyǵymen jaldaý sharty jasalǵanyn, bul otbasynyń uzaq jáne turaqty turǵanyn kórsetetinin atap ótti. İs júrgizýdi toqtatý ýaqytsha sıpatta, sot aktisin oryndaýǵa kedergi keltirmeıdi jáne kámeletke tolmaǵandardyń quqyqtaryn qorǵaýǵa baǵyttalǵan. Nátıjesinde kasasıalyq saty tómengi sottardyń sheshimderin kúshinde qaldyrdy.