Qyzylordada polıseıler agressıvti er adamdy ustaý úshin standartty emes sharalardy qoldanýǵa májbúr boldy: onyń aıaqtaryn skochpen baılady. Oqıǵa maýsym aıynda bolǵan, alaıda vıdeo tek qazir ǵana jelige tarap, keń rezonans týdyrdy. Egjeı-tegjeıin infohub.kz saıty habarlaıdy.
Qyzylorda oblystyq polısıa departamentiniń baspasóz qyzmetiniń málimetinshe, oqıǵa 17 maýsymda bolǵan. Túngi saǵat 12-ler shamasynda qalalyq polısıa basqarmasynyń «102» arnasyna Óserbaev kóshesindegi kópqabatty úıdiń turǵyndarynan habarlama túsken. Turǵyndar tynyshtyqty buzyp, ózin orynsyz ustaǵan er adamnyń agressıvti minez-qulqyna shaǵymdanǵan.
Oqıǵa ornyna kelgen patrúldik polısıa qyzmetkerleri ózin orynsyz ustaýdy jalǵastyryp, tártip saqshylarynyń zańdy talaptaryna baǵynbaǵan buzaqyny anyqtaǵan. Qorshaǵan ortanyń qaýipsizdigin qamtamasyz etý úshin polıseıler quqyq buzýshynyń qaýipti jáne agressıvti áreketterin toqtatý sharalaryn qoldanýǵa májbúr bolǵan. Atap aıtqanda, olar onyń aıaqtaryn skochpen baılaǵan.
Tekserý barysynda er adamnyń buryn da esirtki zattaryn tutynǵany úshin birneshe ret jaýapkershilikke tartylǵany anyqtalǵan. Oqıǵa ornyna jedel járdem brıgadasy shaqyrylǵan. Buzaqyǵa qatysty zańnamada kózdelgen sharalar qoldanylyp, mundaı áreketterdiń qaıtalanbaýy týraly resmı eskertý jasalǵan.
Polısıa azamattarǵa eske salady: eger siz adamnyń orynsyz nemese qaýipti minez-qulqynyń kýási bolsańyz, bul týraly dereý jedel qyzmetterge habarlaý qajet.