Keńes jáne reseılik ánshi Larısa Dolına 71 jasqa toldy. Ol Instagram-daǵy paraqshasynda jankúıerlerine ashyq hat jarıalap, sahnadan qashan ketetini týraly synshylarǵa jaýap berdi, dep habarlaıdy infohub.kz saıty.
Ánshi jelide fotosýret jarıalap, óziniń sezimderi men oılaryn ashyq jetkizdi. «Búgin men 71 jasqa tolyp otyrmyn. Mine, men búgin osylaı kórinemin. Jyldar qalaısha jyldam óte shyqty... Biraq ómirimde sonshama jaqsylyq boldy, barlyq jamandyq pen qorqynyshty bastan keshirip, ony jeńip, betti aýdaryp, ómirimniń jańa jylyna taǵy da bir ádemi ári este qalarlyqtaı dúnıe jasaý kerek degen sezimmen qadam bastym. Sahnada taǵy qansha júretinimdi bilmeımin, bári kókte sheshiledi... Biraq Qudaı qansha ómir berse, sony qabyldap, ári qaraı ómir súremin», — dep jazdy ol.
Ánshi adamdarǵa degen senimin joǵaltpaǵanyn, sondyqtan ózin baqytty sanaıtynyn aıtty. «Men baı adammyn, biraq materıaldyq jaǵynan emes, alaıaqtar meni eshteńesiz qaldyrýǵa tyrysty. Men dostaryma, jaqyndaryma, óz shyǵarmashylyǵyma jáne bárine qaramastan adamdarǵa degen senimge baımyn. Kóp nárseni úırendim jáne áli de úırenýdemin. Meniń ornymdy basatyn jańa býyn juldyzdarynyń ósip kele jatqanyn kórip, oǵan ózimniń de qatysym bar ekenin bilý — men úshin baqyt (bul — meniń ketýimdi qalaıtyndarǵa jaýabym). Meniń shyǵarmashylyq ómirim óte baı jáne men áli kúnge deıin suranystamyn (meni qart dep, sahnada ornym joq dep jazatyndarǵa ókinishke oraı)», — dep keltiredi onyń sózin NUR.KZ.
Ol sondaı-aq ár ótken mınýttan lázzat alýǵa tyrysatynyn aıtty, sebebi buryn da, qazir de optımıs. «Ózime ne tileımin? Kásibı jolymnyń jalǵasýyn, densaýlyq pen kúsh-qýat, jáne sizderdiń, qymbatty jazylýshylarym, qoldaýlaryńyzdy», — dep qorytyndylady Dolına.
Jankúıerler ánshini týǵan kúnimen quttyqtap, kóptegen jyly lebizder qaldyrdy. Eske salaıyq, Larısa Dolına ózin aldaǵan alaıaqtardan 144 mln rúblden astam qarajatty sot arqyly óndirip alǵan.