Qazaqstanda memlekettik jáne jeke uıymdardyń latyn qarpindegi jazbalary men bannerlerin ornalastyrýǵa ýaqytsha tyıym salyndy. Bul sheshim qazaq álipbıiniń latyn grafıkasyna negizdelgen jańa nusqasynyń bekitilýin kútýmen baılanysty, dep habarlaıdy infohub.kz saıty.
Ǵylym jáne joǵary bilim mınıstrligi ortalyq jáne jergilikti atqarýshy organdarǵa menshik nysanyna qaramastan barlyq uıymdardyń latyn grafıkasyndaǵy kórneki jáne ózge de aqparattaryn jetildirilgen álipbı bekitilgenge deıin ornalastyrýdy toqtata turýdy usyndy.
Qazirgi ýaqytta Til bilimi ınstıtýtynyń, «Til-Qazyna» ulttyq ǵylymı-praktıkalyq ortalyǵynyń jáne joǵary oqý oryndarynyń ǵalym-lıngvısteri qazaq tili álipbıiniń latyn grafıkasyna negizdelgen jobasy men emle erejelerin jetildirýde.
Buǵan deıin qazaq álipbıin latyn grafıkasyna kóshirýge bólingen qarajattyń negizgi bóligi jumys josparlarynyń ózgerýine baılanysty búdjetke qaıtarylǵany habarlanǵan bolatyn. Jobaǵa jáne sıfrlyq qyzmetterge respýblıkalyq búdjetten qosymsha qarajat álipbı men barlyq normatıvtik qujattar resmı bekitilgennen keıin ǵana bólinetin bolady.