Reseı Syrtqy ister mınıstri Sergeı Lavrov Máskeýdiń Ýkraınadaǵy janjaldy retteý boıynsha kelissózderdiń jańa kezeńine daıyn ekenin málimdedi. Bul týraly reseılik syrtqy saıası vedomstvo basshysy Ýkraına tóńiregindegi ahýalǵa arnalǵan dóńgelek ústelde sóılegen sózinde habarlady, dep jazady infohub.kz saıty.
«Biz kelissózderden eshqashan bas tartpaǵanymyzdy túsindirdik. Ótken barlyq kelissózder bizdiń bastamamyzben úzilgen joq. Sondyqtan áriptesterimiz daıyn bolsa, muny qaıta jalǵastyrýǵa ábden bolady dep oılaımyn. Aıtarymyz bar», — dep keltiredi mınıstrdiń sózin basylym.
Lavrov janjal bastalǵannan beri reseılik tarap ustanymyn bir de bir ózgertpegenin atap ótti. «Osy ustanym aıasynda aqylǵa qonymdy ymyralar izdeýge daıynbyz, biraq qaýipsizdigimizdi qamtamasyz etý, shekaralarymyzda NATO-nyń paıda bolýyna jol bermeý jáne osy jerlerde ǵasyrlar boıy turyp jatqan orys jáne orys tildi adamdardyń zańdy quqyqtaryn qamtamasyz etý mindetin túbegeıli ózgertken joqpyz», — dedi Reseı SİM basshysy.
Prezıdent kómekshisi Iýrı Ýshakovtyń aıtýynsha, Reseı Ýkraına janjalyn retteý boıynsha kelissózderdi yqtımal qaıta bastaý úshin Abý-Dabıdi basym alań sanaıdy.
Buǵan deıin Donald Tramptyń arnaıy ókilderi — Stıv Ýıtkoff pen Djared Kýshner Máskeýge baryp, reseılik kóshbasshy Vladımır Pýtınmen kelissózder júrgizgen. Keıin olar Ýkraına prezıdenti Vladımır Zelenskımen kezdesti. Osydan soń AQSh prezıdenti Zelenskı men Pýtınmen úshjaqty kezdesý ótkizýge jol berdi.
Al qarsańynda amerıkandyq kóshbasshy Ýkraına men Reseı bir-biriniń energetıkalyq nysandaryna shabýyl jasamaýǵa keliskenin málimdedi.