Astanada Sport kúnine oraı «Qazaqstandaǵy sport: reformalardan nátıjege» atty konferensıa ótti. Salalyq mınıstrlik ókilderi, sportshylar, ǵalymdar men sport dárigerleri saladaǵy negizgi ózgeristerdi, búdjettiń balalar sportyna qaıta bólinýin jáne eldiń iri halyqaralyq jarystardy ótkizýge daıyndyǵyn talqylady, dep habarlaıdy infohub.kz.
Dıalog alańynyń bastamashysy ári uıymdastyrýshysy — qazirgi jáne burynǵy sportshylardy biriktiretin táýelsiz uıym «Sportshylar keńesi» qoǵamdyq birlestigi. Konferensıa baǵdarlamasyn týrızm jáne sport vıse-mınıstri Serik Jarasbaev ashty.
Júrgizilip jatqan reformanyń tıimdiliginiń basty kórsetkishteriniń biri — kásibı klýbtarǵa memlekettik shyǵyndardy ońtaılandyrý. Sarapshylardyń dereginshe, buryn jyl saıyn búdjetten sheteldik sportshylarǵa (legıonerlerge) jalaqy tóleýge bólinetin 3,5 mlrd teńge 2026 jyly tolyǵymen qaıta baǵyttalǵan. Endi bul qarajat tolyq kólemde buqaralyq, balalar-jasóspirimder sporty men ınfraqurylymdy damytýǵa jumsalady.
Aldaǵy jyldary Qazaqstan birneshe iri álemdik jarystar men halyqaralyq forýmdardyń alańyna aınalady. «2026 jyldyń qazan aıynda Astanada kúres túrlerinen álem chempıonaty, sol jyldyń qarashasynda Dúnıejúzilik antıdopıng agenttiginiń (WADA) atqarý komıtetiniń otyrysy ótedi. 2027 jyly Qazaqstan bokstan, dzúdodan, taekvondodan, ústel tenısinen, kıbersporttan álem chempıonattaryn jáne short-trekten jasóspirimder chempıonatyn qabyldaıdy, sondaı-aq elimizde ÝEFA-nyń 51-shi kongresi ótedi», — dep habarlady baspasóz qyzmeti.
Konferensıa jumysy úsh negizgi baǵyt boıynsha ótti: memlekettik basqarý men reformalardyń tıimdiligi, sıfrlandyrýdy, sporttyq medısına men ǵylymdy engizý, sondaı-aq buqaralyq sporttaǵy urpaq sabaqtastyǵy. «Sportshylar keńesi» QB-nyń qatysýymen biryńǵaı alań qurý sheshim qabyldaýshy sheneýnikter men júrgizilip jatqan ózgeristerdiń nátıjesin tikeleı sezinetin sport qaýymdastyǵy arasynda tikeleı dıalog ornatýǵa múmkindik berdi.