Bereke Bank-ti Power International Holding (PIH) holdıńi úshin satyp alýda agent bolǵan katarlyq Lesha Bank ınvestısıalyq banki 2026 jyldyń birinshi jartyjyldyǵynda paıda men aktıvterdiń aıtarlyqtaı óskenin habarlady, dep málimdeıdi infohub.kz saıty.
Bank aksıonerlerine tıesili taza paıda 123,7 mln katarlyq rıaldy (QAR) qurady, bul shamamen 15,9 mlrd teńgege balamaly. Bul kórsetkish ótken jyldyń sáıkes kezeńimen salystyrǵanda 50,1%-ǵa ósti.
Basqarýdaǵy aktıvter (AUM) 78%-ǵa ulǵaıyp, 19,2 mlrd QAR-ǵa (shamamen 2,4 trln teńge) jetti. Investısıalardyń jalpy kólemi 27,6%-ǵa ósip, 4,7 mlrd QAR-dy (shamamen 581,4 mlrd teńge) qurady. Banktiń maýsym aıynyń sońyndaǵy jıyntyq aktıvteri 11,1 mlrd QAR-ǵa (shamamen 136,1 mlrd teńge) jetip, bir jyl burynǵydan 53,9%-ǵa artty.
Bank aksıonerlerine tıesili menshikti kapıtal 11,1%-ǵa ósip, 1,54 mlrd QAR-dy (shamamen 190,5 mlrd teńge) qurady. Klıenttik depozıtter kólemi 78,8%-ǵa ósip, 5,6 mlrd QAR-ǵa (shamamen 692,7 mlrd teńge) jetti.
Banktiń jyldyń alǵashqy alty aıyndaǵy kirisi 239,1 mln QAR-dy (shamamen 29,6 mlrd teńge) qurap, komısıalyq jáne dıvıdendtik túsimderdiń artýyna baılanysty 105,9%-ǵa ósti.
Banktiń bas dırektory Mohammed Ismaıl Al Emadı kórsetkishterdiń ósýin ártaraptandyrylǵan ınvestısıalyq portfelmen baılanystyrdy. «Mundaı turaqtylyq bizdiń komandalardyń tártiptiliginiń jáne klıentter men seriktestermen tyǵyz jumystyń arqasynda múmkin boldy. Biz jergilikti kapıtaldy álemdik naryqtarmen jáne halyqaralyq kapıtaldy Katarmen baılanystyra otyryp, uzaq merzimdi turaqty tabys ákeletin sapaly aktıvterdi izdeýge jáne basqarýǵa erekshe nazar aýdara otyryp, dál osy qaǵıdatty ustanamyz», – dedi ol.
Lesha Bank Qazaqstan úshin erekshe mańyzǵa ıe. Buǵan deıin Bereke Bank katarlyq banktiń onyń aksıalaryn 2024 jyldyń qazan aıynda ózi úshin emes, Power International Holding holdıńiniń múddesi úshin satyp alǵanyn ashyq aıtqan bolatyn. Nátıjesinde Bereke Bank-tiń túpkilikti benefısıarlary PIH-ke teń úlespen ıelik etetin katarlyq kásipkerler Mýtaz Al-Haıat pen Ramez Al-Haıat boldy.
Dál osy holdıń 2025 jyldyń basynda Tele2 jáne Altel brendterine ıe «Mobaıl Telekom-Servıs» mobıldi operatoryn satyp alýdy aıaqtady. Mámile somasy $1,1 mlrd qurady.
Telekomýnıkasıadan basqa, Power International Holding qurylymdary Qazaqstandaǵy birqatar iri jobalarǵa qatysady, onyń ishinde Qashaǵanda gaz óńdeý zaýyttaryn salý, Beıneý – Bozoı – Shymkent gaz qubyrynyń ekinshi jelisi jáne Qyzylorda oblysynda bý-gaz qondyrǵylary negizinde elektr stansıasyn salý bar.
Lesha Bank ıslamdyq qarjylandyrý qaǵıdattary boıynsha jumys isteıtin ınvestısıalyq bank bolyp tabylady. Ol Katar qarjy ortalyǵynyń qarjylyq retteý basqarmasymen (QFCRA) retteledi jáne QFBQ tıkerimen Katar qor bırjasynda satylady.