Qytaıdyń Li Auto kompanıasy i9 flagmandyq elektr krosoverin tanystyrdy. Jańa model tórt «nóldik gravıtasıa» rejımi bar oryndyqpen, eki elektr qozǵaltqyshymen jáne 705 km-ge deıingi júris qorymen jabdyqtalǵan, dep habarlaıdy infohub.kz saıty.
Óndirýshi i9-dy álemdegi eń aerodınamıkalyq serıalyq krosover dep ataıdy: aerodınamıkalyq kedergi koefısıenti 0,215. Kólik ólshemderi — 5225×1970×1752 mm, dóńgelek bazasy — 3168 mm. Eń az burylý dıametri 10,6 m. Bul kórsetkishke sym arqyly basqarylatyn rúl jáne burylatyn artqy dóńgelekter arqyly qol jetkizilgen.
Salonnyń basty ereksheligi — bir ýaqytta demalys qalpyna keltiriletin tórt «nóldik gravıtasıa» oryndyǵy. Artqy oryndyqtar tolyq ólshemdi jáne eki baǵytta buryla alady. Salonda ústelshe de qarastyrylǵan, jabdyqta 10 lıtrlik tońazytqysh, 29 dınamıkti aýdıojúıe, 6K ajyratymdylyqtaǵy 29 dúımdik aldyńǵy ekran jáne 4K ajyratymdylyqtaǵy 21 dúımdik artqy dıspleı bar.
Li Auto i9 eki elektr qozǵaltqyshymen jáne tolyq jetekpen jabdyqtalǵan. Qondyrǵynyń jalpy qýaty — 400 kVt (536 a.k.), eń joǵary aınalý momenti — 660 N·m. Krosover 100 km/saǵ jyldamdyqqa 4,9 sekýndta jetedi. 101 kVt·saǵ batareıasy CLTC sıkli boıynsha 705 km-ge deıin júris qoryn qamtamasyz etedi. Óndirýshiniń dereginshe, 10 mınýttyq jyldam qýattaý arqyly 500 km júris qoryn tolyqtyrýǵa bolady.
Embodied Intelligence paketi jalpy ónimdiligi 1280 TOPS bolatyn eki M100 esepteý chıpinen jáne tórt lıdardan turady. Júıe qalada jáne jyldam tas joldarda júrgizýshige kómektesý úshin Mach VLA basqarý modelin paıdalanady. Qaýipsizdik úshin 11 qaýipsizdik jastyǵy jáne kúsheıtilgen shanaq qurylymy jaýap beredi.
Alǵashqy kólikter CATL batareıalaryn alady. Keıin Li Auto Sunwoda shyǵaratyn óz ázirlemesindegi batareıalarǵa kóshýdi josparlap otyr.
Qytaıda Li Auto i9 baǵasy 369 800 ıýán (shamamen 25,2 mln teńge). Modeldiń qytaı naryǵyndaǵy satylymy bastalyp ketti. i9-dyń Qazaqstanǵa resmı jetkizilý josparlary týraly ázirge habarlanǵan joq.
Buǵan deıin Kýrsıv Avto Li Auto Mega mınıvenin qalaı «dóńgelektegi qonaq bólmege» aınaldyrǵanyn jazǵan bolatyn.