Halqy nebári 44 myń adamdy quraıtyn Ortalyq Eýropadaǵy Lıhtenshteın knázdigi taq muragerliginiń jańa erejelerin jarıalady. Endi áıelder de taqqa otyra alady. Bul sheshim eldiń ulttyq merekesi kúni jarıalandy.
Lıhtenshteınniń qazirgi bıleýshisi knáz Hans-Adem II 1989 jyldan beri knázdik otbasynyń basshysy bolyp keledi. Ereje ózgerisi onyń murageri, tuńǵysh uly murager knáz Aloızge áser etpeıdi. Aloız sońǵy jıyrma jyl boıy knázdik mindetterdiń kópshiligin atqaryp keledi.
Lıhtenshteın úıiniń málimdemesinde: "Taq muragerligi tártibi erkekterdiń basymdyǵynan absolútti basymdyqqa ózgertilýde. Bul bolashaqta jynysyna qaramastan tuńǵysh bala taq murageri, keıin Lıhtenshteınniń knázi nemese knágınásy bolady degendi bildiredi", — delingen.
Ózgeris qazirgi muragerlik tizbegine áser etpeıdi — ol tek murager knáz Aloız ben onyń jubaıy murager knágıná Sofıanyń tórt balasynyń urpaqtaryna ǵana qatysty bolady. Aloız málimdemesinde: "Zańdaǵy bul ózgerispen biz Lıhtenshteın knázdigi de, knázdik úı de osy jaýapkershilikke eń jaqsy daıyndalǵan adammen basqarylýyn qamtamasyz etkimiz keledi", — dedi.
Lıhtenshteın — Shveısarıa men Aýstrıa arasynda ornalasqan, teńizge shyǵa almaıtyn shaǵyn el. Onyń bıleýshisi Eýropadaǵy áriptesterinen aıyrmashylyǵy, keń saıası ókilettikterge ıe. 2011 jyly Ulybrıtanıa muragerlik zańdaryn ózgertip, monarhtyń tuńǵysh qyzdaryna taqqa otyrýǵa ruqsat bergen bolatyn.