Lıvıa Ortalyq banki men Qytaı Halyq banki lıvıalyq komersıalyq bankterdi qytaıdyń transshekaralyq tólem júıesi CIPS-ke qosý týraly kelisimge keldi, dep inbusiness.kz Euronews-ke silteme jasap habarlady, dep jazady infohub.kz.
CIPS-ke qosylý lıvıalyq bankterge qytaı valútasynda tólemderdi tikeleı jiberýge jáne qabyldaýǵa múmkindik beredi, deldal bankter men dollar ınfraqurylymyn paıdalaný qajettiligin azaıtady. Munyń halyqaralyq esep aıyrysýdy jyldamdatyp, shyǵyndardy tómendetip, bıznes úshin qarjy operasıalaryn jeńildetetini kútilýde.
CIPS 2015 jyly Qytaı Halyq bankimen halyqaralyq ıýánmen esep aıyrysý júıesi retinde quryldy. Qazir ol qytaı valútasynyń álemdik saýdada qoldanylýyn keńeıtýdiń jáne dástúrli halyqaralyq tólem arnalaryna balamanyń negizgi quraldarynyń biri sanalady.
Kelisim aıasynda Lıvıa Qytaıǵa tikeleı aqsha aýdarymdaryn jiberetin bolady jáne qytaı bankteri arqyly tikeleı akredıtıv ashý múmkindigine ıe bolady. Taraptardyń pikirinshe, bul saýda operasıalaryn neǵurlym ashyq ári tıimdi etedi, sondaı-aq ımporttaýshylar, eksporttaýshylar jáne shaǵyn bıznes ókilderiniń jumysyn jeńildetedi.
Sondaı-aq taraptar saýdadaǵy kedergilerdi joıýǵa jáne jaqyn arada Lıvıa bank sektorynyń resmı delegasıasynyń Beıjińge saparyn uıymdastyrýǵa kelisti. Sapar barysynda komersıalyq bank ókilderi elektrondy tólem salasyndaǵy Qytaı tájirıbesin zerdelep, qarjylyq yntymaqtastyqty odan ári damytýdy talqylaýǵa nıetti.