Astanada ótken Digital Bridge forýmynda Kaspi.kz basshysy ári teń quryltaıshysy Mıhaıl Lomtadze premer-mınıstrge jeke jasandy ıntellekt kómekshisi Kasper klıenttiń naqty suranysyna saı taýarlardy qalaı tańdaıtynyn kórsetti, dep habarlaıdy infohub.kz saıty.
Kórsetilim qarapaıym sóılemnen bastaldy: «Men densaýlyq kórsetkishterimdi baqylaǵym keledi». Kasper máseleni sheshýdiń nusqalaryn usynyp, sodan keıin dıalog barysynda úzdik smart-saqına modelderin salystyrýǵa, iPhone-men úılesimdiligin eskerýge jáne ólshemin anyqtaýǵa kómektesti.
«Álemde jasandy ıntellektti klıentter úshin paıdaly áreketke aınaldyrǵan mysaldar óte az. Biz bul tehnologıany tájirıbede qoldanýǵa umtylamyz. Qazaqstanda kúndelikti qoldanylatyn sýperqosymsha bar — ol basqa jerde derlik kezdespeıtin biregeı ónim. Endi bizdiń mindetimiz — kúndelikti jeke kómekshi jasaý», — dedi Mıhaıl Lomtadze.
Onyń aıtýynsha, Kasper — Qazaqstanda jasalǵan Kaspi.kz-tiń óz ázirlemesi. Servıs klıenttiń qalaýyn eskeredi, pikirlerdi taldaıdy, sıpattamalardy salystyrady jáne kúrdeli termınderdi qarapaıym sózdermen túsindiredi. Onymen qazaq, orys, aǵylshyn jáne túrik tilderinde sóılesýge bolady.
Kasper iske qosylǵannan beri ony mıllıon adam paıdalandy. Mıhaıl Lomtadzeniń aıtýynsha, eń bastysy — qoldanýshylardyń qaıta oralýy: ol servıs sapasynyń negizgi ólshemi dep osyny sanaıdy.
Bank qyzmeti Qazaqstan Respýblıkasynda lısenzıalanady.