Amerıka Qurama Shtattarynyń Kalıfornıa shtatynda 34 jastaǵy er adam kınoteatrda fılm kórip otyrǵan kezde uıaly telefonyn qoldanǵan kórermenge burysh búrkip jibergen degen aıyppen ustaldy, dep habarlaıdy infohub.kz saıty.
Býrbank qalalyq polısıa departamentiniń málimetinshe, Metú Ýer 15 qyrkúıekte AMC Burbank 16 kınoteatrynda telefon qoldanyp otyrǵan kórermenge burysh búrkigen degen kúdikpen qamaýǵa alyndy. Burysh búrkilgen kezde jaqyn jerde otyrǵan taǵy eki kórermen de titirkený belgilerin sezingen. Úsh adam da jergilikti aýrýhanada medısınalyq kómek aldy.
Ýerge usaq buzaqylyq baby boıynsha aıyp taǵyldy jáne Býrbank qamaý ornyna qamaldy.
NBC News telearnasyna sóılegen kýágerdiń aıtýynsha, oqıǵa fılm bastalǵannan keıin 40 mınýt ótkende bolǵan.
«Barlyǵy qalypty júrip jatqan, kenet artymnan aerozol qutysynyń dybysyn estidim, búrikkish sıaqty. Sosyn bir jigit: „Maǵan burysh búrkip jiberdi. Myna adam maǵan burysh búrkidi“, — dep aıqaılady», — dedi Djo Rodrıges atalǵan aqparat quralyna.
Taǵy bir kórermen Ýerdiń kórshisine burysh búrkigen soń dereý kınoteatrdan júgirip shyqqanyn kórgenin aıtty. Úsh adam ony qýyp, kınoteatrdyń basqa bóliginen tapqan.
Rodrıgestiń NBC News-ke aıtýynsha, bul qaqtyǵys ózin-ózi qorǵaýǵa uqsamaǵan.
«Eń kózge túskeni — ol telefonda otyrǵan jigittiń ózine „aqyl aıtqanyn“ aıtty. Bul jaı ǵana kınoteatrda bireýdiń dórekiligine shydamaı, ashýǵa berilgen adam edi», — dedi Rodrıges.