Los-Andjeles mańynda jańalyq túsiretin tikushaq apatqa ushyrap, úsh adam qaza tapty, taǵy ekeýi aýrýhanaǵa jetkizildi. Bul týraly qalanyń órtke qarsy qyzmeti málimdedi, dep habarlaıdy infohub.kz saıty.
NBC Los Angeles telearnasy apatqa ushyraǵan tikushaq óziniń NewsChopper4 apparaty ekenin rastady. Ol Telemundo 52 arnasy úshin de jumys istegen. Tikushaq seısenbi kúni adam shyǵyny bolǵan avtobýs apaty týraly reportaj túsirý úshin sol mańda bolǵan.
Arnanyń júrgizýshileri tikushaqtaǵy eki adamnyń da qaza tapqanyn habarlap, olardy «qadirli dostar ári áriptester» dep atady. Marqumdar — Elıana Moreno men Djordj Marchınıv. Úshinshi qurban apat kezinde jerde bolǵan, alaıda onyń esimi jarıalanbady.
Áýe kóligi jergilikti ýaqytpen 19:00-ge taıaý (Ulybrıtanıa ýaqytymen 01:00) Chatsýort turǵyn aýdanyndaǵy eki saýda ǵımaratynyń arasyna qulady. Bul týraly Los-Andjeles órtke qarsy qyzmetiniń ókili BBC-ge aıtty.
Apattan shyqqan órt tórt kólikke jáne eki qoıma konteınerine tarady. Oqıǵa ornyna 70-ten astam órt sóndirýshi jumyldyryldy, dep qosty órtke qarsy qyzmet.
NBC4 arnasynyń tikeleı efırinde tájirıbeli júrgizýshi Kolın Ýıláms emosıaǵa berilip, apatqa ushyraǵan apparat jergilikti jańalyqtar arnasynyń tikushaǵy ekenin rastady.
«Biz onyń jańalyq túsiretin tikushaq ekenin bildik. Ondaǵy adamdarymyzben baılanys úzilgenin de bildik, endi ǵana rastaý aldyq», — dedi Ýıláms.
Buǵan deıin órtke qarsy qyzmet kapıtany Branden Sılverman BBC-niń amerıkalyq seriktesi CBS-tiń jergilikti fılıalyna bylaı degen: «Tikushaqtan tys jerde bolǵan bir zardap shegýshi rastaldy. Ol oqıǵa ornynda qaza tapty dep jarıalandy».
Oqıǵa kezinde sol mańda birneshe jańalyq tikushaǵy avtobýs apaty týraly reportaj túsirip júrgen. Sol kúni erterek Chatsýortta qalalyq avtobýsqa jol talǵamaıtyn kólik soqtyǵysyp, eki adam qaza taýyp, altaýy jaraqat alǵan, dep habarlady BBC-niń amerıkalyq seriktesi CBS.