AQSH-tyń Lýızıana shtatynda 17 mysyq óli tabylyp, taǵy 20-sy aýyr jaǵdaıda qutqaryldy. Osy oqıǵaǵa baılanysty 29 jastaǵy Medıson Rebekka Kolelloǵa ondaǵan aıyp taǵyldy. Ol beısenbi kúni tańerteń Lýızıana shtatyndaǵy Ýoker qalasynda ornalasqan Lıvıngston okrýginiń qamaý ortalyǵyna óz erkimen kelgen, dep habarlaıdy infohub.kz saıty.
Tergeý málimetterine súıensek, Kolelloǵa ólgen mysyqtarǵa qatysty janýarlarǵa qatygezdik jasaýdyń 17 qylmystyq epızody jáne janýarlarǵa qatygezdik jasaýdyń 37 ákimshilik epızody boıynsha aıyp taǵylǵan.
Aıyptaýǵa Ýoker polısıa departamenti qyzmetkerleriniń 12 qyrkúıekte júrgizgen tekserýi sebep boldy. Olar janýarlarǵa qatygezdik jasaldy degen habarlamany tekserý úshin shaqyrtý alǵan. Vedomstvonyń málimetinshe, tártip saqshylary shamamen túski 12:30-da oqıǵa ornyna kelip, «Ýoffls Ýeı Hoým» dep atalatyn jergilikti kásiporynnyń ashyq turǵan esigin kórgen. Olar ishke baqylaý maqsatynda kirip, temperatýranyń 100°F (37,8°C) shamasyna jetkenin anyqtaǵan.
Polısıanyń habarlaýynsha, ǵımarat ishinde ondaǵan mysyq pen mysyq balasy qamalyp, olardyń azyq-túlikke jáne sýǵa qol jetkizý múmkindigi bolmaǵan. Tergeýshilerdiń dereginshe, 17 janýar óli kúıinde tabylsa, qalǵan 20-sy aýyr jaǵdaıda qutqarylǵan.
«Mıss Kolellonyń jaýapkershiliginde bolǵan mysyqtar men mysyq balalary, sózsiz, qorqynyshty taǵdyrǵa tap boldy. Qatygezdikke ushyraǵan janýarlardyń sany júrekti aýyrtady. Bizdiń departament mundaı qatygezdikke Ýokerde jol berilmeıtinin anyq jetkizýdi kózdeıdi», – dedi Ýoker polısıasynyń bastyǵy Devıd Eddıson The Guardian basylymyna.
Bılik ókilderi mysyqtar ustalǵan aýmaqtyń gıgıenalyq turǵydan taza bolǵanyn, alaıda asa joǵary temperatýra men veterınarlyq kómektiń joqtyǵy aýyr ári adamgershilikke jatpaıtyn saldarǵa ákelgenin atap ótti.
Polısıa aman qalǵan janýarlarǵa shuǵyl kómek tartqan. Lýızıanadaǵy WAFB jańalyqtar arnasynyń málimetinshe, Ýokerdiń janýarlardy baqylaý qyzmeti, jaqyn mańdaǵy Denhem-Sprıngs qaýymdastyǵynyń janýarlar baspanasynyń ókilderi jáne Rescue, Rehome & Repeat komersıalyq emes uıymynyń eriktileri medısınalyq kómek kórsetý men baspana berýge jumyldyrylǵan.
Lýızıana gýmanıtarlyq qoǵamynyń dırektory Djeff Dorson The Advocate basylymyna bergen suhbatynda Lýızıana shtatyndaǵy Gonzales qalasynda ornalasqan Rescue Alliance uıymy Kolello óziniń garajynda ustaǵan delingen 12 naýqas mysyqty óz qamqorlyǵyna alǵanyn aıtqan. Dorsonnyń sózinshe, 12 mysyqtyń barlyǵy joǵarǵy tynys joldarynyń ınfeksıasymen jáne sańyraýqulaq aýrýyna kúdikpen zardap shekken.