Parıjdegi Lývr murajaıy óz eksponattarynyń bir bóligin Qazaqstandaǵy kórmege ákelýi múmkin. Bul múmkindikti Qazaqstan Respýblıkasynyń Mádenıet jáne aqparat mınıstri Arman Qyryqbaev Parıjde fransýz murajaıynyń prezıdenti Krıstof Lerıbo men talqylady, dep habarlaıdy infohub.kz saıty.
Kezdesý Fransıadaǵy Qazaqstan mádenıeti kúnderi aıasynda ótti. Sapar barysynda qazaqstandyq vedomstvo basshysy Fransıanyń Mádenıet mınıstri Katrın Pegarmen de kelissózder júrgizdi. Taraptar teatr, murajaı jáne arhıv isi salalarynda yntymaqtastyqty keńeıtýge kelisti. Atap aıtqanda, elder shyǵarmashylyq ujymdardyń ózara gаstrólderin uıymdastyrýdy, sondaı-aq mamandar úshin oqytý, taǵylymdamalar men sheberlik sabaqtaryn ótkizýdi josparlap otyr.
Parıjdegi mádenı kúnder baǵdarlamasy Qazaqstan kınosynyń kúnderi men Branlı jaǵalaýyndaǵy murajaıda – Jak Shırak murajaıynda ótken «Qazaqstan – Fransıa: mádenı dıalogtan birlesken jobalarǵa» dóńgelek ústelin qamtydy.
Basty oqıǵa Parıjdegi «Marını» teatrynda ótken qazaqstandyq ártisterdiń gala-konserti boldy. Keshti asha otyryp, Arman Qyryqbaev is-sharanyń dıplomatıalyq mańyzdylyǵyn atap ótti:
«Búginde Qazaqstan men Fransıa arasyndaǵy qarym-qatynas nyǵaıtylǵan strategıalyq seriktestik rýhynda qarqyndy damyp keledi. 2024 jyly Qazaqstan Respýblıkasynyń Prezıdenti Qasym-Jomart Toqaevtyń Fransıaǵa memlekettik sapary jáne 2023 jyly Fransıa Prezıdenti Emmanúel Makronnyń Qazaqstanǵa sapary ekijaqty yntymaqtastyqqa jańa serpin berdi. Búgingi gala-konsert halyqtarymyz arasyndaǵy dostyqty nyǵaıtý jolyndaǵy taǵy bir mańyzdy qadam bolady dep senemin».
Teatr sahnasynda fransýz kórermenderine dástúrli qazaq ánderi, kúıleri jáne zamanaýı týyndylar usynyldy. Konsertke Alısher Karımov, Zarına Altynbaeva, Ernar Sadyrbaı (Amre), Eldar Saparaev, Rasýl Jarmagambetov, Farhat Kýbıev, Nazym Saǵyntaı, «Astana Balet» teatry, HasSak etnofolklorlyq ansambli jáne Mezzo toby qatysty. Mýzykalyq súıemeldeýdi Qurmanǵazy atyndaǵy Qazaq ulttyq halyq aspaptar orkestri qamtamasyz etti.
Buǵan deıin «Kýrsıv» Lývrdyńshýly tonaýdan keıin Apolon galereıasyn qalaı ashqanyn jazǵan bolatyn.