Qazaqstannyń Mádenıet jáne aqparat mınıstri Arman Qyryqbaev Ońtústik Koreıanyń Tedjon qalasynda koreı generaly Oń Bom Do jerlengen memorıaldyq keshenge bardy. Rásim Prezıdent Qasym-Jomart Toqaevtyń tapsyrmasymen ótti, dep habarlaıdy infohub.kz saıty.
Vedomstvonyń baspasóz qyzmeti málim etkendeı, Mádenıet jáne aqparat mınıstrliginiń jańa basshysy Arman Qyryqbaev memleket basshysynyń Koreıa Respýblıkasyna resmı sapary aıasyndaǵy delegasıa quramynda júr.
Memorıal janynda qurmetti qaraýyl qatysqan rásim ótti. Mınıstr gúl qoıyp, ómirin Koreıanyń táýelsizdigi jolyndaǵy kúreske arnaǵan general Oń Bom Do rýhyna taǵzym etti.
Tedjon memorıaldyq kesheni Ońtústik Koreıadaǵy basty este qalar oryndardyń biri sanalady. Munda el aldynda erekshe eńbegi sińgen shamamen 150 myń adam jerlengen.
Oń Bom Do tarıhy Qazaqstan men Koreıa qarym-qatynasynda aıryqsha oryn alady. General ómiriniń sońǵy jyldaryn Qazaqstanda ótkizdi. Qaıtys bolǵan soń ol Qyzylordada jerlendi.
2021 jyly Oń Bom Do súıegi qazaqstandyq taraptyń kómegimen Ońtústik Koreıaǵa jetkizilip, Tedjonda qaıta jerlendi. Bıyl generaldyń tarıhı otanyna oralǵanyna bes jyl tolady.
Sapar sońynda Arman Qyryqbaev qurmetti qonaqtar kitabyna jazba qaldyrdy.
«Memorıalǵa barý memlekettik sapar baǵdarlamasynyń bir bóligine aınalyp, eki halyqtyń ortaq tarıhyna degen taǵy bir sımvoldyq qurmet boldy», — dep atap ótti mınıstrlikte.
Aldyńǵy kúni Prezıdentter Qasym-Jomart Toqaev pen Lı Chje Món Seýlde keńeıtilgen quramda kelissóz júrgizdi. Onda Ońtústik Koreıa basshysy Lı Chje Món áriptesine ulttyq batyrdyń súıegin otanyna qaıtarýǵa kórsetken járdemi úshin taǵy da alǵys aıtty.