Pop-dıvalar Madonna men Kaılı Mınoýg ózderiniń birlesken jumysyn resmı rastap, kópten kútken trektiń shyǵý kúnin jarıalady. «Love Sensation (Afterhours Mix)» dep atalatyn birlesken jumys Warner Records leıblinde juma, 7 tamyzda shyǵady, dep habarlaıdy infohub.kz saıty.
Remıks Madonnanyń «Confessions II» jańa álbomyndaǵy attas ánniń negizinde jasalǵan. Bul án Billboard Dance Airplay bı chartyn bastap turǵan bolatyn. Jańa nusqanyń prodúseri — Stúart Praıs, ol ánshimen «Confessions on a Dance Floor» álbomynan beri birge jumys istep keledi.
Trek tusaýy 1 tamyzda Amsterdamdaǵy WorldPride festıvalinde Madonnanyń óner kórsetýi kezinde ótti. 67 jastaǵy ártis 58 jastaǵy Mınoýgty arnaıy qonaq retinde sahnaǵa shaqyrdy, bul kórermender úshin kútpegen tosynsyı boldy. Konsertten keıin Madonna áleýmettik jelilerde birlesken fotosýretterdi jarıalap, avstralıalyq juldyzǵa qatysqany úshin alǵys bildirdi.
Jankúıerlerge sıngldiń fızıkalyq basylymdary da qoljetimdi bolady: ártis resmı saıtynda úsh nusqadaǵy kompakt-dıskilerge aldyn ala tapsyrys ashylyp qoıǵan.