Halyqaralyq atom energıasy agenttigi (MAGATE) KHDR Ionbendegi basty ıadrolyq kesheninde ýran baıytýdyń jańa nysanyn salǵanyn málimdedi, dep habarlaıdy infohub.kz saıty.
Agenttiktiń baǵamynsha, jańa qurylys 28 kaskadqa deıin gaz sentrıfýgasyn syıdyra alady.
«Kanson men Ionbendegi baıytý qondyrǵylarynyń qazirgi jumysy, sondaı-aq KHDR-dyń qarýlyq ıadrolyq materıalyn óndirýdi odan ári keńeıtýi týraly habarlamalar qatty alańdaýshylyq týdyrady», — dep atap ótti MAGATE bas dırektory Rafael Grossı.
Sonymen qatar Agenttik Phenánǵa jaqyn Kansondaǵy keńeıtilgen ýran baıytý nysanynyń iske qosyla bastaǵanyn málimdedi.
Aıta keteıik, MAGATE ınspektorlary 2009 jyldan beri Soltústik Koreıaǵa kire almaıdy, sondyqtan agenttik Phenánnyń áreketin spýtnıktik sýretter men ashyq derekkózderdegi málimetterdi, sonyń ishinde KHDR memlekettik BAQ jarıalaǵan fotosýretterdi taldaý arqyly baqylap otyr.
Agenttik dereginshe, Ionbendegi jańa eki qabatty ǵımarat keshen aýmaǵyndaǵy ekinshi ýran baıytý nysany bolyp tabylady. Mamandar mundaı qorytyndyǵa qurylys kezeńindegi spýtnıktik sýretterdi KHDR kóshbasshysy Kım Chen Ynnyń maýsymdaǵy saparynda túsirilgen fotosýrettermen salystyrý arqyly keldi.
Eske salaıyq, 20 tamyzda Phenán mańynan Japon teńizine qaraı birneshe jaqyn ushý qashyqtyqtaǵy balıstıkalyq zymyran ushyryldy.
Shildede KHDR-da eldiń ıadrolyq kúshterin sapalyq jáne sandyq jaǵynan kúsheıtý týraly sheshim qabyldandy.