Qazaqstanda 12 tamyzda magıstratýrada oqýǵa memlekettik bilim granttaryna konkýrsqa qujat qabyldaý bastaldy. Qujattardy 18 tamyzǵa deıin qosa alǵanda, joǵary oqý oryndarynyń qabyldaý komısıalaryna, onyń ishinde vırtýaldy komısıalarǵa tapsyrýǵa bolady, dep habarlaıdy infohub.kz saıty.
Keshendi testileýge shamamen 58 myń adam qatysty. Bilim granttaryna konkýrsqa belgilengen ótý balyn jınaǵan talapkerler qujat tapsyra alady. Granttar keshendi testileý nátıjeleri boıynsha konkýrstyq negizde bólinedi.
Konkýrsqa qatysý úshin jeke kýáliktiń kóshirmesi, joǵary bilim týraly dıplom men qosymshasy, keshendi testileý sertıfıkaty, al bar bolsa — shet tilin bilýdi rastaıtyn halyqaralyq sertıfıkat usyný qajet.
Ótinish berý kezinde talapker bir top bilim berý baǵdarlamasyn tańdap, úsh joǵary oqý ornyna deıin kórsete alady.
Magıstratýrada oqýǵa barlyǵy shamamen 11 myń memlekettik bilim granty qarastyrylǵan.
Grant ıeleriniń tizimderin 25 tamyzǵa deıin ǵylym jáne joǵary bilim mınıstri Saıasat Nurbektiń, mınıstrliktiń jáne Ulttyq testileý ortalyǵynyń resmı saıty men áleýmettik jelilerinde jarıalaý josparlanýda.
Bolashaq magıstranttardy qabyldaý 28 tamyzǵa deıin aıaqtalady.
Buǵan deıin «Kýrsıv» Qazaqstanda ákimdikter bóletin bilim granttaryna ótinim qabyldaý bastalǵanyn jazǵan bolatyn. 2026 jyly jergilikti atqarýshy organdar bakalavrıat, magıstratýra jáne rezıdentýra baǵdarlamalary boıynsha oqýǵa, onyń ishinde óńirlerde suranysqa ıe mamandyqtar boıynsha kadr daıarlaýǵa 2392 grant qarastyrdy.