Maıra Meldebekova Qazaqstannyń Oqý-aǵartý birinshi vıse-mınıstri qyzmetinen bosatyldy, dep habarlaıdy infohub.kz.
Tıisti úkimet qaýlysy primeminister.kz saıtynda jarıalandy. Qujatta: «Qazaqstan Respýblıkasy Úkimetiniń qaýlysymen Meldebekova Maıra Turǵanbaıqyzy Qazaqstan Respýblıkasy Oqý-aǵartý birinshi vıse-mınıstri qyzmetinen bosatyldy» delingen.
Meldebekova bul qyzmetti 2025 jyldyń mamyr aıynan bastap atqarǵan. Ol 1971 jyly dúnıege kelgen, Abaı atyndaǵy Almaty memlekettik ýnıversıteti men Qorqyt Ata atyndaǵy Qyzylorda memlekettik ýnıversıtetin bitirgen. 1993–2005 jyldary Shymkent, Almaty jáne Shyǵys Qazaqstan oblystarynyń orta mektepterinde matematıka jáne ınformatıka pániniń muǵalimi bolyp jumys istegen. 2005–2018 jyldary QR Bilim jáne ǵylym mınıstrligi júıesinde basshylyq qyzmetter atqarǵan. 2018–2020 jyldary Qyzylorda oblysynyń bilim basqarmasynyń basshysy, 2020–2021 jyldary QR Bilim jáne ǵylym mınıstrliginiń Mektepke deıingi jáne orta bilim komıtetiniń tóraǵasy, 2021–2022 jyldary QR Bilim jáne ǵylym mınıstrliginiń Bilim salasyndaǵy sapany qamtamasyz etý komıteti tóraǵasynyń orynbasary, 2022–2025 jyldary QR Oqý-aǵartý mınıstrliginiń Bilim salasyndaǵy sapany qamtamasyz etý komıteti tóraǵasynyń orynbasary bolǵan.