Fransıa prezıdenti Emmanýel Makron Eýropa Reseıdiń áskerı nysanasyna aınalýy múmkin dep málimdedi. Sebebi Eýropa Ýkraınanyń strategıalyq tyly bolyp otyr. Bul týraly infohub.kz saıty habarlaıdy.
Fransýz kóshbasshysynyń aıtýynsha, jaqyn arada Reseı 300 myń adamdy jumyldyrýy múmkin degen senarıdi shyndyqqa janasymdy dep sanaıdy. AQSh, Eýropa jáne Ýkraına barlaý derekterine silteme jasaǵan Makron Reseı Memlekettik dýma saılaýynyń ótýin kútkenin qosty.
Sonymen qatar Fransıa prezıdenti sońǵy aptalarda búkil Eýropada dushpandyq áreketter jıilegenin atap ótti.
«Ótken aptada men saıası kúshterdiń ókilderin shaqyryp, olardy osy qaýiptiń damýy jáne bizdiń elimizdegi saldary týraly eskerttim. Reseı Eýropany Ýkraınanyń strategıalyq tyly dep sanaıdy, óıtkeni eýropalyqtar ýkraındyqtarǵa kómektesip jatyr jáne Kıev Reseıdi soǵysty toqtatýǵa májbúrleý úshin onyń munaı óńdeý zaýyttary men nysandaryna soqqy berip otyr. Sondyqtan Eýropa nysanaǵa aınalýy múmkin», — dedi Makron.
Onyń aıtýynsha, shabýyldar aqparattyq salada jalǵan aqparat taratý arqyly jáne kıberkeńistikte de júzege asyrylyp otyr.
Buǵan deıin Makron Reseı tarapynan gıbrıdtik shabýyldar qaýpi kúsheıip bara jatqanda Fransıa asa mańyzdy ınfraqurylymdy qorǵaý josparyn daıyndap jatqanyn málimdegen.
Eske salaıyq, buǵan deıin Lıtva bıligi áskerı qaýip týyndaǵan jaǵdaıda turǵyndardy kóshirýdiń egjeı-tegjeıli josparyn daıyndaǵany belgili boldy. Azamattardy Polshaǵa kóshirý josparlanyp otyr.
Sondaı-aq Germanıa bıligi eldiń densaýlyq saqtaý júıeleriniń soǵysqa jáne jaralylardyń jappaı aǵynyna daıyndyq deńgeıin tekserýdi bastaǵany habarlanǵan.