Jetisý oblysynda mal satyp alýshymyn dep tanystyryp, qoı otaryn ıemdengen er adamǵa qatysty úkim shyqty, dep habarlaıdy infohub.kz saıty.
Jetisý oblysy prokýratýrasynyń málimetinshe, Aqsý aýdanynda birneshe ret alaıaqtyq jasaǵany úshin kináli dep tanylǵan adamdarǵa qatysty sot úkimderi zańdy kúshine endi.
Qylmystyq isterdiń biri boıynsha, sottalǵan adam usaq mal satyp alýshymyn dep tanystyryp, Ashybulaq aýylynyń bes turǵynyna tıesili 266 qoıdy aldap, senimdi teris paıdalanyp ıemdengen. Zardap shekkenderge 13,8 mln teńgeden astam shyǵyn keltirilgen. Shyǵynnyń bir bóligi ótelgenine qaramastan, memlekettik aıyptaýshy bul qaıtalanǵan alaıaqtyq úshin qoǵamnan oqshaýlaýǵa baılanysty emes jaza taǵaıyndaýǵa negiz bolmaıtynyn atap ótti. Sot aıyptalýshyny kináli dep tanyp, 2 jyl 5 aıǵa bas bostandyǵynan aıyrý jazasyn taǵaıyndady.
Taǵy bir qylmystyq is boıynsha, 2023-2025 jyldar aralyǵynda sottalǵan adam qurylys materıaldaryn jetkizemin, júrgizýshi kýáligin rásimdep beremin degen jáne basqa da jalǵan ýádelermen 10 zardap shegýshiniń 3 mln teńgeden astam aqshasyn aldap alǵany anyqtaldy. Birinshi satydaǵy sot oǵan 3 jyl 6 aı bas bostandyǵyn shekteý jazasyn taǵaıyndady. Aqsý aýdany prokýratýrasynyń apelásıalyq ótinishi boıynsha úkim ózgertilip, jaza úsh jylǵa bas bostandyǵynan aıyrýmen almastyryldy. Apelásıalyq saty keltirilgen zalaldyń tolyq ótelgenin eskerdi, alaıda bul jaǵdaı qylmystyq jaýapkershilikti joqqa shyǵarmaıdy.
Qadaǵalaý organy zańdy kúshine engen sot aktileri qylmystan keltirilgen múliktik zalaldyń tolyq nemese ishinara ótelýine qaramastan, kinálilerdi qylmystyq jaýapkershilikten bosatpaıtynyn rastaıtynyn atap ótti.
Azamattardy saq bolýǵa jáne kúmándi paıda tabý sqemalaryn usynatyn adamdarǵa senbeýge shaqyrdy.